ÚEU-ǵa 47 memlekettik grant beriledi
«Azamattyq bastamalardy qoldaý ortalyǵy úkimettik emes uıymdarǵa (ÚEU) arnalǵan memlekettik granttar berý boıynsha konkýrsqa ótinimderdi qabyldaýdy bastady. Úkimettik emes uıymdarǵa arnalǵan granttar azamattyq bastamalardy qoldaý, azamattyq qoǵam ınstıtýttarynyń áleýetin áleýmettik salany damytýdyń ózekti máselelerin sheshýge tartý maqsatynda beriledi. Bıyl QR Aqparat jáne qoǵamdyq damý mınıstrliginiń tapsyrysyna sáıkes, 6 sala boıynsha 47 memlekettik grant, onyń ishinde 22 qysqa merzimdi, 16 – orta merzimdi jáne 9 uzaq merzimdi joba iske asyrylatyn bolady», - dedi Ǵ. Qurman Ortalyq kommýnıkatsııalar qyzmetindegi baspasóz máslıhatynda.
Memlekettik grant myna 6 baǵyt boıynsha bólinedi: halyqtyń áleýmettik osal toptaryn qoldaý; azamattyq qoǵamnyń damýyna, onyń ishinde ÚEU qyzmetiniń tıimdiligin arttyrýǵa járdemdesý; azamattar men uıymdardyń quqyqtaryn, zańdy múddelerin qorǵaý; qoǵamdyq kelisim men jalpyulttyq birlikti nyǵaıtý; jastar saıasatyn jáne balalar bastamalaryn qoldaý; otbasylyq-demografııalyq máselelerdi sheshýge járdemdesý.
Onyń aıtýynsha, 2023 jylǵa arnalǵan Respýblıkalyq bıýdjet qarajatynan bólingen granttardyń jalpy somasy 1 mlrd 292 myń teńgeni qurady.
«Qysqa merzimdi, orta merzimdi jáne uzaq merzimdi granttar engizildi. Granttyń túrine qaraı qarjylandyrý kólemine, iske asyrý merzimderine, ÚEU úshin konkýrsqa qatysý sharttaryna, eseptilikke qoıylatyn túrli talaptarǵa sáıkes aıqyndalady. Qysqa merzimdi granttardy iske asyrý merzimi úsh aıdan 12 aıǵa deıin, orta merzimdi granttar bir jyldan eki jylǵa deıingi aralyqty qamtıdy. Al uzaq merzimdi granttar 2 jyldan 3 jylǵa deıin júzege asyrylady», - dedi Azamattyq bastamalardy qoldaý ortalyǵy basshysy.
Onyń sózine qaraǵanda, ÚEU-lar jıi qoıatyn suraqtardyń biri – ol granttar somasyna qatysty. Qysqa merzimdi granttar boıynsha qarjylandyrý kólemi aılyq eseptik kórsetkishtiń keminde bes júz eselengen somasynda bolady jáne úsh myń eselengen mólsherinen aspaıdy. Orta merzimdi granttar keminde 3 myń eselengen AEK deńgeıinde belgilense, eń joǵarysy 10 myń eselengen somada bekitilgen. Sondaı-aq uzaq merzimdi granttar boıynsha qarjylandyrý kólemi aılyq eseptik kórsetkishtiń 10 myń eselengen somasynan kem emes.
«Qysqa merzimdi jáne orta merzimdi granttarǵa ótinimder Operatorǵa 12 qańtar men 1 aqpan aralyǵynda, uzaq merzimdi granttarǵa 12 qańtar men 15 aqpan aralyǵynda Astana ýaqyty boıynsha saǵat 18.30-ǵa deıin engiziledi. Barlyq ótinim grants@cisc.kz. elektrondyq poshtasy arqyly qabyldanady», - dedi Ǵalym Qurman.