ÚEU áleýmettik kásipkerlikti damytýǵa kúsh salýy tıis - Túımebaev

ASTANA. QazAqparat - Búgin Ońtústik Qazaqstan oblysynyń ákimi Janseıit Túımebaev óńirdegi qoǵamdyq uıymdardyń ókilderimen kezdesti, dep habarlaıdy ákimniń baspasóz qyzmeti.

Jıynǵa oblys, aýdan, qala ákimderiniń orynbasarlary,  oblystyq basqarma, bıznes-qurylym jáne kommertsııalyq uıymdar basshylary, aýdan, qalalardaǵy úkimettik emes uıym basshylary men oblystyq qoǵamdyq keńes músheleri qatysty.  

Ońtústik Qazaqstan oblysy ákiminiń orynbasary Ulasbek Sádibekov  oblystaǵy qoǵamdyq birlestikterdiń qyzmeti týraly baıandama jasady.

Onyń aıtýynsha, qazirgi tańda óńirimizde 1268  qoǵamdyq uıym tirkelgen. Onyń 558-i úkimettik emes uıym bolsa, 174-i belsendi úkimettik emes uıym sanalady.  Oblysta úkimettik emes uıymdar qoldaý maqsatynda jyl saıyn qarjylandyrý kólemi artyp keledi. Nátıjesinde óńirimizde 200-ge jýyq  joba júzege asyrylýda.

 «Alaıda keıbir salalar boıynsha júıeli jumys jetkiliksiz. Atap aıtar bolsam, din salasyndaǵy túsindirý jáne nasıhat, memlekettik jastar saıasaty, sýıtsıd máselesi, kámeletke tolmaǵan jasóspirimder arasyndaǵy erte júktilik, etnosaralyq yntymaq, bilim salasyndaǵy jemqorlyq, turǵyndardyń quqyqtyq saýattylyǵyn arttyrý máselelerinde úkimettik emes uıymdardyń belsendiligi áli de bolsa tómen» - dedi Ulasbek Sádibekov.

Májiliste sóz alǵan «OQO Azamattyq Alıansy» zańdy tulǵalardyń qaýymdastyq nysanyndaǵy birlestiginiń tóraǵasy Sháripbek Jamalbek memlekettik áleýmettik tapsyrys sheńberinde uzaq merzimdi 3 jyldyq konkýrs ótkizý máselesin kóterdi. Al, Shymkent qalasyndaǵy múgedekter qoǵamdyq birlestiginiń tóraǵasy Vadım Toropov Ordabasy, Saıram, Báıdibek, Túlkibas, Shardara aýdandarynda «Inva Taksı» qyzmetin uıymdastyrý jóninde usynysyn jetkizdi.

Munan soń minberge "Sozaq jastary" qoǵamdyq birlestiginiń tóraǵasy Birjan Sarjanov,  «QR jergilikti soǵys jáne Aýǵanstan ardagerler odaǵy» OQO boıynsha qoǵamdyq birlestiginiń tóraǵasy  Ǵalymjan Maıhanov,  «Balalardy SPID-ten qorǵaý ortalyǵy» qoǵamdyq birlestiginiń tóraıymy Janneta Jazyqbaeva,  «Dos-Demeý» qoǵamdyq birlestiginiń tóraǵasy Janysbek Ótegenovter baıandama jasap, birqatar utymdy usynystaryn jetkizdi.

Jıyndy qorytqan oblys ákimi  óńirimizdegi úkimettik emes sektordyń belsendiligin arttyrý maqsatynda bıznes qurylymdarmen tyǵyz qarym-qatynas ornatyp, yntymaqtastyqta jumys atqarýǵa  shaqyrdy.

 «Azamattyq qoǵam ınstıtýttary - bılik pen buqaranyń arasyndaǵy kópir ispetti. Jalpy, qandaı da bir iste  bolmasyn, ózara birlik pen yntymaqtyń arqasynda, túsinistiktiń nátıjesinde júzege asyrýymyz qajet.  Osy rette sizderge tek úkimet qarjysyna ǵana qarap otyrmaı, bıznes qurylymdarmen birlese, yntymaqtasa jumys isteýge shaqyramyn, ıaǵnı úkimettik emes uıymdar áleýmettik kásipkerlikti arttyrýǵa kúsh salýy tıis. Sonda ǵana qoǵamnyń ómirsheń problemalaryn túpkilikti sheshýge qol jetkizetin bolamyz», - dedi Janseıit Qanseıituly.

Jıyn sońynda óńir basshysy oblystaǵy belsendi úkimettik emes uıym ókilderin  alǵys hatpen marapattady.