UEM ekologııalyq tólemnen túsetin qarajatty 100 paıyz osy salaǵa baǵyttaýdy qoldady

NUR-SULTAN. QazAqparat – Ulttyq ekonomıka mınıstrligi ekologııalyq tólemderden túsetin qarajatty 100 paıyz ekologııalyq máselelerge baǵyttaý bastamasyn qoldady, dep habarlaıdy QazAqparat tilshisi.

Aıta ketsek, Parlament Májilisinde Ekologııa, geologııa jáne tabıǵı resýrstar mınıstri Maǵzum Myrzaǵalıev QR keıbir zańnamalyq aktilerine ekologııa máseleleri boıynsha ózgerister men tolyqtyrýlar engizý týraly zań jobasyn qorǵaǵan bolatyn.

Zań jobasyn talqylaý barysynda depýtat Taras Qıtýov Ulttyq ekonomıka vıtse-mınıstri Ermek Alpysovqa suraq qoıdy.

«Ekologııalyq kodeks jobasynda ekologııalyq tólemderdi óńirlerdiń jergilikti ekologııalyq qajettigine 100 paıyz baǵyttaý týraly normalar bar. Aıtyńyzshy, bul másele boıynsha sizdiń ustanymyńyz qandaı?» - dedi Taras Qıtýov.

Bul suraqqa jaýap bergen Ermek Alpysov jalpy bul tetikti Ulttyq ekonomıka mınıstrligi qoldaıtynyn málim etti.

«Jergilikti bıýdjetke túsetin ekologııalyq tólemder jergilikti problemalardy sheshý máselesine baǵyttalýy kerek. Aldyn ala bıýdjettik kodekske silteme retinde ekologııa kodeksinde bul másele qarastyrylatyny jazylǵan», - dedi ol.

Ermek Alpysovtyń bul sózine Parlamet Májilisiniń tóraǵasy Nurlan Nyǵmatýlın qoldaý bildirdi.

«Durys. Bul óte mańyzdy sharýa. Az bolsa da, kóp bolsa da ekologııalyq tólemder jergilikti bıýdjetke túsedi. Al odan keıin ol aqsha qaıda, qandaı maqsatqa jumsaldy – ony bir Qudaı biledi. Jasyratyny joq, sol aqsha ekologııadan tys basqa jaǵdaıǵa jumsalatyny bar. Solaı emes pe? Endi osy zań jobasyna sáıkes ekologııalyq tólemder tek qorshaǵan ortany qorǵaý sharalaryna jumsalatyn bolady. Bul óte durys ári qajetti dep oılaımyn. Sondyqtan bul normany qoldaımyz», - dedi Nurlan Nyǵmatýlın.