ÝEFA Chempıondar lıgasy: «Lıverpýl» madrıdtik «Realdy» jeńdi

<p>ASTANA. KAZINFORM — Fýtboldan ÝEFA Chempıondar lıgasynyń 5-týrynda aǵylshyndyq «Lıverpýl» óz alańynda Madrıdtiń «Real» komandasyn qabyldady.</p>

Nıderlandylyq Andre Slot baptaıtyn «Lıverpýl» Anglııa chempıonatynda 31 upaımen jeke-dara kósh bastap kele jatsa, ótken maýsymda Chempıondar lıgasyn utqan «Realdyń» jaǵdaıy máz emes-ti.

La Lıgada Karlo Anchelottıdiń shákirtteri «Barselonany» alǵa jiberip, ekinshi orynda keledi. Al Chempıondar lıgasynyń kestesinde aǵylshyndyq klýb 12 upaımen úzdik úshtikti túıindese, «Real» (6 upaı) nebári 21-satyda turǵan edi. Sondyqtan madrıdtik komandaǵa jaǵdaıyn túzeý úshin baryn salý qajet bolatyn.

Germanııalyq maman ıÝrgen Klopp jattyqtyrǵan kezeńde «Lıverpýl» ıspanııalyq klýbpen 6 match ótkizip, sonyń beseýinde jeńilip, bireýinde teń túsken edi.

Bul joly ekinshi taımda alań ıelerinen Aleksıs Makallıster 52-mınýtta esep ashty. 

Alańǵa jańadan qosylǵan Aleksıs Vaskes 59-mınýtta «lıverpýldyq» qorǵaýshy Endrıý Robertsondy qatelesýge májbúr etti. Alaıda Kılıan Mbappe qaqpashy Kıývın Kelleherden aılasyn asyra almady.

Arada 10 mınýt ótkende, Ferlan Mendı óz aıyp alańynda Mohamed Salahty shalyp jyqty. Salah ta 11 metrlik núkteden múlt ketti. Degenmen 77-mınýtta ekinshi taımda oıynǵa qosylǵan Kodı Gakpo esepti 2:0-ge jetkizdi.

Osylaısha, 15 upaı jınap, jalpy kestede kósh bastaǵan «Lıverpýl» kelesi oıynynda jeńiske jetse, úzdik segizdikke iligedi. Al jarys jolyn jalǵastyrýǵa múmkindik beretin 24 komandanyń qataryna kirý úshin «Realǵa» ter tógýge týra keledi.

Eske sala keteıik, budan buryn fýtzaldan «Qaırattyń» elıtalyq kezeńde jeńiske jetkenin jazǵan bolatynbyz.