Údetilgen ındýstrııalyq-ınnovatsııalyq damý baǵdarlamasyn júzege asyrýǵa jumsalatyn qarjy 50 mıllıard AQSh dollarynan asady
Bul týraly búgin atalmysh baǵdarlamaǵa daıyndyq jumystaryn qorytyndylaýǵa arnalǵan Úılestirý keńesiniń otyrysynda Indýstrııa jáne saýda mınıstri Áset Isekeshov málim etti, dep habarlaıdy QazAqparat.
Onyń sózine qaraǵanda, atalmysh baǵdarlamaǵa jumsalatyn qarjynyń biraz bóligi, ıaǵnı ınfraqurylymdyq nysandarmen baılanysty jobalarǵa qajetti qarjy bıýdjetten bólinetin bolsa, taǵy bir bóligi «Samuryq-Qazyna» qorynyń resýrstarynan alynady.
«Sondaı-aq taǵy Eýropalyq bank pen Eýrazııalyq damý banki jáne Qazaqstannyń damý banki sııaqty bankterden bólinetin qarjy bar. Buǵan qosa qazaqstandyq jáne sheteldik kompanııalar tarapynan tikeleı ınvestıtsııalar tartylatyn bolady. «Jalpy baǵdarlamany júzege asyrýdaǵy basty maqsat elimizge shet memleketterden ınvestıtsııa tartý. Biz Kedendik odaq aıasynda ózgelerden jedel, jan-jaqty ári básekege qabiletti bolýymyz kerek. Menińshe, naqty maqsattary men mindetteri bar bizdiń baǵdarlama ınvestıtsııa tartýǵa baǵyttalǵan tamasha múmkindik», dedi Á.Isekeshov.