Ýchaskelik dárigerdiń birqatar jumysyn meıirbıke atqaratyn bolady – mınıstrlik

ASTANA. QazAqparat – Densaýlyq saqtaý vıtse-mınıstri Tımýr Sultanǵazıev Ortalyq kommýnıkatsııalar qyzmetinde ótken brıfıngide dárigerlerdiń júktemesin aızaıtý baǵytynda qolǵa alynǵan sharalardy atady, dep habarlaıdy QazAqparat tilshisi.

«Bul boıynsha ekijaqty jumys istep jatyrmyz. Birishi baǵyt – ýchaskelik dárigerlerdiń júktemesin azaıtý. Óıtkeni kóptegen qujat toltyrý kerek, aqparattyq júıelerge qosymsha málimetterdi engizý kerek. Sondyqtan bıyl qosymsha emhanalyq standart engizilgen bolatyn. Ol standart boıynsha kóptegen júkteme meıirbıkege berildi. Ár ýchaskelik dárigerdiń qosymsha úsh meıirbıkesi bar. Mysaly, dárilik zattarǵa retsept jazyp berý, aýrýhanaǵa jatý úshin jazylatyn baǵyttaýshy anyqtama, dınamıkalyq baıqaýǵa qaıtalap kelgen naýqastardyń qan qysymyn tekserý sııaqty sharýalar osy meıirbıkelerge berilip otyr. Sonymen qatar densaýlyǵyna baılanysty jumysqa jaramsyzdyq paraǵyn da meıirbıkeler jazady», - dedi ol.

Aıtýynsha, naýqas dárigerdiń aldyna kelmeı turyp, meıirbıke barlyq málimetti surap, aqparattyq júıege jaza alatyn tártip jolǵa qoıylyp otyr.

«Osynyń bári ýchaskelik dárigerdiń júktemesin azaıtýǵa baǵyttalǵan. Ekinshi baǵyt – aqparattyq júıelerdi bir-birimen ıntegratsııalaý. Bul úshin biz Tsıfrlyq damý, ınnovatsııalar jáne aeroǵarysh ónerkásibi mınıstrligimen birge «E-densaýlyq» atty ekojúıe jasap jatyrmyz. Bul boıynsha bir ǵana baza bolady. Sol baza arqyly árbir dáriger nemese árbir naýqas búkil aqparatqa qol jetkizedi. Bul jumys bastalyp ketti. Osy jyldyń aıaǵy men kelesi jyly júıe daıyn bolǵannan keıin dárigerdiń jumysy jeńildeıdi», - dedi vıtse-mınıstr.