UBT tapsyrý kezinde qýlyqqa barǵan talapkerler grantty qaıtaryp beredi

ASTANA. QazAqparat – Ǵylym jáne joǵary bilim mınıstri Saıasat Nurbek UBT-da talapkerdiń kompıýterine onlaın qosylyp, joǵary ball alýǵa kómekteskender máselesine túsinik berdi, dep habarlaıdy QazAqparat tilshisi.

«Biz Ulttyq qaýipsizdik komıtetimen óte tyǵyz jumys isteımiz. Ózderińiz biletindeı, test tapsyrmalary men olardyń mazmuny «Memlekettik qupııa týraly» zańnyń obektisi sanalady. Sondyqtan munda UQK tergeý júrgizedi. Bıyl barlyq óńirde komıtettiń departamentteri tikeleı baqylaý júrgizdi. Bizdiń ulttyq testileý ortalyǵynyń ókilderimen birge jumys istedi», - dedi mınıstr BAQ ókilderiniń saýalyna Úkimet otyrysynan keıin.

Vedomstvo basshysy tekserý barysynda júzdegen olqylyq áshkere bolǵanyn atap ótti. Naqty sany áli de anyqtalýda.

«Sońǵy málimetke saı, 300-den astam talapqa sáıkes kelmeý faktileri anyqtaldy. Osy jaǵdaılardyń árqaısysy boıynsha UQK jáne Ulttyq testileý ortalyǵynyń ókilderimen birlesip, qosymsha tergeý júrgiziledi. Eger aqparat rastalsa, onda ball joıylady. Eger osy ýaqytqa deıin talapker grant ıegeri atanyp úlgerse, onda ol ony keıin qaıtarady. Tıisinshe, grant qaıta úlestiriledi. Qyrkúıek aıynda naqty belgili bolady. Eń joǵary ball jınaǵan, biraq grant almaǵan úmitkerler arasynda osy granttar qaıta bólinedi», - dep túıindedi Saıasat Nurbek.

Mınıstrdiń sózinshe, máseleniń naqty mán-jaıy anyqtalyp, nátıjesi qyrkúıek aıynyń ortasyna qaraı jarııalanady.

Eske salaıyq, buǵan deıin UBT-da talapkerdiń kompıýterine qashyqtan qosylyp, joǵary ball alýǵa kómektesken kúdiktiler ustalǵanyn jazyp edik.