UBT-nyń tegin synaq testileýi iske qosyldy

NUR-SULTAN. QazAqparat - Ulttyq testileý ortalyǵynyń saıty arqyly synaq testileýden onlaın ári tegin ótýge bolady, dep habarlaıdy QazAqparat Bilim jáne ǵylym mınıstrligine silteme jasap.

Testilenýshi synaqqa qatysý úshin prob-ent.testcenter.kz saıtynda JSN-in engizip, beıindik pánder kombınatsııasyn tańdaı alady.

Talapker synaq testileýinen ótý kezinde test tapsyrmalarymen tanysyp, tańdalǵan pánder boıynsha óz bilim deńgeıin tekserýge múmkindik alyp otyr.

Sondaı-aq, onlaın synaq ulttyq biliktilik testileýin tapsyratyn pedagogter úshin de qoljetimdi. Muǵalimder prob-nqt.testcenter.kz siltemesi arqyly synaqtan óte alady.

Aıta keteıik, bıyl túlekterge UBT-ny eki ret tapsyrýǵa ruqsat beriledi.

Sondaı-aq, bıylǵy UBT-da erekshe qajettiligi bar test tapsyrýshylarǵa 40 mınýt qosylady.

Budan bylaı UBT tapsyrýshylarǵa qorytyndy balmen birge taqyryptyq taldaý qorytyndysy beriledi.

Bilim jáne ǵylym mınıstri Ashat Aımaǵambetov kelesi oqý jyly úshin joǵary oqý oryndaryna 73 myń, kolledjderge 31 myń grant bólinetinin aıtqan bolatyn.

Al, naýryzdaǵy UBT-da talapkerlerdiń 70%-dan astamy shekti ball jınady.