UBT men synama testileý balynda nátıje aýytqýy joǵary bolǵandar qatań tekseriledi - Aımaǵambetov

NUR-SULTAN. QazAqparat – UBT men synama testileý baldarynda nátıje aýytqýy joǵary talapkerler qatań tekseriledi. Bul týraly QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.

«Ulttyq biryńǵaı testileý aıaqtaldy. Jalpy, 145 myńnan astam talapker qatysyp, olarǵa 2 ret test tapsyrý múmkindigi berildi. Meniń oıymsha, buryn-sońǵy bolmaǵan, óte qolaıly jaǵdaı jasaldy dep aıta alamyz. Tıimdilik jaǵyna keler bolsaq, balalar úshin óte yńǵaıly format boldy. Buǵan qosa, akademııalyq adaldyq qaǵıdalaryn saqtaý úshin de óte mańyzdy qadamǵa aınaldy. Endi tamyz aıyna deıin beınekameralar boıynsha zerdeleý jasalyp, eger táýekelder baıqalatyn bolsa, onda tıisti sheshim qabyldaýymyz kerek. Ótken jyly da mundaı jumysty alǵash ret júrgizgen edik. Sonda biz bekitilgen talaptarǵa sáıkes ózin ustamaǵany, erejelerdi buzǵany úshin biraz talapkerdiń nátıjesin joıdyq. Mysaly, naýryzda synama testileý boldy. Sol synama testileý baldary men UBT testileýdiń baldaryn salystyryp, 20 baldan kóp aýytqý bolsa, onda nátıjelerinde osyndaı aýytqý bar barlyq balanyń beınejazbalaryn bólek qaraımyz. Úlken zertteý ótkizemiz», - dedi Ashat Aımaǵambetov mınıstrliktiń apparat jınalysynda.

Onyń atap ótýinshe, synama testileý men UBT-da 20 ball aýytqý bolsa, onda bul táýekeldiń bar ekendigin bildiredi.

«Sondyqtan Ulttyq biryńǵaı testileýge qatysty tıisti sheshim tamyz aıynda shyǵatyn bolady», - dedi mınıstr.