UBT-ǵa oqýshynyń ornyna ózge adamnyń kirý faktileri anyqtalǵan joq – Testileý ortalyǵy
Negizgi UBT bastalǵaly bir aı ótti. Búginge deıin 229 oqýshy testileý zalyna smartfon, shpargalka jáne basqa da tyıym salynǵan zattardy alyp ótý áreketi úshin emtıhandy tapsyrý múmkindiginen aıyryldy. Testileý kezinde erejelerdi buzǵan 175 adam aýdıtorııadan shyǵarylyp, olardyń nátıjeleri joıyldy. Bireýdiń ornyna test tapsyrýǵa kirgen bógde tulǵalar anyqtalmaǵan.
Aıta ketsek, testileý zaldarynda jasalǵan vıdeojazbalar UBT aıaqtalǵannan keıin 31 qazanǵa deıin tekseriledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda oqýshynyń UBT nátıjeleri joıylady, berilgen oqý granty qaıtarylady.
Jalpy, osy tórt aptada mektep túlekteri testti 169 myńnan astam ret tapsyrǵan. Onyń ishinde talapkerlerdiń 74% qazaq tilinde, 26% orys tilinde, 0,1% aǵylshyn tilinde testileýden ótti.
UBT bastalǵaly shekti baldy 77% astam talapker jınaı aldy. Ortasha ball – 69 baldy qurady. Eń joǵary ball – 137, ony elimiz boıynsha úsh oqýshy jınady.
«UBT-nyń tórtinshi aptasy aıaqtaldy. Talapkerler testileýdiń ekinshi múmkindigin tapsyrýda. Osy aptada biz IELTS jáne TOEFL halyqaralyq sertıfıkattaryn «Aǵylshyn tili» boıynsha UBT baldaryna aýystyrý shkalasyn jarııaladyq. Sondaı-aq, SAT, ACT, IB, A-Level standarttalǵan test baldary bekitildi. Osy sertıfıkat ıegerlerine nátıjelerin UBT balyna konvertatsııalaýǵa múmkindik beredi», - dep atap ótti QR ǴJBM Ulttyq testileý ortalyǵynyń dırektory Rýslan Emelbaev.
Aıta keteıik, erekshe bilim berý qajettilikteri bar oqýǵa túsýshiler úshin qolaıly jaǵdaı jasaýdyń arqasynda UBT-ǵa tórt aptanyń ishinde 486 talapker qatysqan.
Eske salaıyq, 2022 jyly UBT tapsyrý erejelerin buzǵan 19 talapkerdiń emtıhan nátıjeleri joıylǵan bolatyn.Buǵan deıin bıylǵy UBT-nyń úshinshi aptadaǵy qorytyndysyn jarııalaǵan edik.