UBT-dan keıin beınejazbalar 25 tamyzǵa deıin tekseriledi

NUR-SULTAN. QazAqparat – UBT kezinde erejeni buzý faktileri anyqtalsa, talapkerdiń test nátıjesin joıamyz. Bul týraly QR BǴM Ulttyq testileý ortalyǵynyń dırektory Dıdar Smaǵulov málim etti, dep habarlaıdy QazAqparat tilshisi.

«Testtiń ashyqtyǵyn qamtamasyz etý maqsatynda bizde «aýhaldy ortalyq» jasaqtalǵan. Atap aıtqanda, testileý «bir test tapsyrýshy–bir kompıýter–bir kamera» qaǵıdaty boıynsha uıymdastyrylmaq. Sondyqtan ár test tapsyrýshyǵa qatysty beınejazbalar saqtalady. Biz ony ózimiz qaraımyz jáne arnaıy kompıýterlik baǵdarlama avtomatty túrde jumys istep, kez kelgen ereje buzý faktilerin anyqtaı alamyz», - dedi D. Smaǵulov Ortalyq kommýnıkatsııalar qyzmetinde.

Onyń aıtýynsha, bul turǵyda tyıym salynǵan zattarǵa, ıaǵnı talapkerdiń smartfon nemese shpargalka sekildi zattardy alyp kirýine tosqaýyl qoıylmaq.

«Barlyq beınejazbalar bıyldyń 25 tamyzyna deıin qaıtadan qaralady. Eger qosymsha tyıym salynǵan zat anyqtalsa nemese basqa da erejeni buzý faktileri baıqalsa, test tapsyrýshynyń UBT boıynsha nátıjesin joıýǵa quqyǵymyz bar. Sondyqtan jumys ótken jyldaǵydaı bıylda da atqarylady, - dedi Ulttyq testileý ortalyǵynyń dırektory.

Taratylǵan málimetke qaraǵanda, memlekettik bilim grantyn taǵaıyndaý konkýrsyna qatysý úshin UBT 15 sáýirde bastalyp, 30 maýsymǵa deıin jalǵasady. Testileý alǵash ret elektrondyq formatta ótedi.

Bilim mınıstrliginiń málimetinshe, aýdıtorııada ne bolyp jatqanyn kórsetetin kameralardan basqa, test tapsyrýshy otyratyn ár ústeldiń ústinde taǵy bir kamera ornatylady. Proktorıng pen beınebaqylaýdyń zamanaýı júıesi jáne UBT-da bógde adamdardy boldyrmaý úshin Face ID tsıfrlyq sáıkestendirý qurylǵysy paıdalanylady. Erejelerdiń saqtalýyn arnaıy kompıýterlik baǵdarlama baqylaıdy. Ol tyıym salynǵan zattardy qoldaný faktilerin avtomatty túrde anyqtaıdy. Eger UBT tapsyrý kezinde talapkerdiń smartfon, shpargalka jáne t.b. tyıym salynǵan zattardy paıdalanǵany anyqtalsa, testileý avtomatty túrde toqtatylady, test tapsyrýshynyń nátıjeleri joıylady.

Sonymen qatar D. Smaǵulov UBT-dan keıingi appelıatsııaǵa ótinish berý tártibin túsindirdi.

Budan buryn habarlanǵandaı, bıyl Ulttyq biryńǵaı testileý elektrondyq formatta ótedi.

Ulttyq biryńǵaı testileýdi eki márte tapsyrýǵa bolady.

Taratylǵan málimetke qaraǵanda, testileýge 4 saǵat (240 mınýt) beriledi. UBT nátıjesi boıynsha talapkerler eń joǵary 140 ball jınaı alady.

Testileý nátıjeleri UBT aıaqtalǵannan keıin birden qoljetimdi bolady.

Árbir talapker jeke kompıýterde otyryp, UBT tapsyrmalaryn oryndaıdy.