UBT-da eń joǵary 139 ball jınaǵan eki oqýshynyń qýlyqqa barǵany belgili boldy

NUR-SULTAN. QazAqparat - Bıylǵy UBT bastalǵaly beri 139 ball jınaǵan eki talapker tirkeldi. Degenmen qaıta tekserý kezinde atalǵan oqýshylardyń ereje buzǵany belgili boldy, dep habarlaıdy QazAqparat.

Bul jaıynda Ulttyq testileý ortalyǵynyń dırektory Rýslan Emelbaev habardar etti.

«Sizder UBT-da óz bilimińizben joǵary upaı jınasańyzdar, biz qatty qýanamyz. Biraq akademııalyq adaldyq qaǵıdalaryn saqtamaı, ońaı tapsyrý joldaryna júginetin talapkerler bar. Sondyqtan sizderge qýanyshty jańalyqty aıtar aldynda qosymsha tekseris júrgizýdi jón kórdik. Ókinishke qaraı, talapkerlerdiń beınejazbasyn qaıta tekserý barysynda ereje buzý faktileri anyqtaldy. Tıisti sharalar qoldanyp, testilenýshilerdiń upaıyn joıdyq» deıdi Rýslan Emelbaev Instagram paraqshasynda.

Onyń aıtýynsha, akademııalyq adaldyq bárinen joǵary turýy tıis.

«Ózińizdi de, ózgelerdi de aldaýdyń qajeti joq. Eń durysy armandaryńyzǵa adal jolmen jetińizder. UBT-da tereń biliminiń arqasynda 140 ball jınaıtyn test tapsyrýshy tabylady dep senemiz. Ol dál siz bolýyńyz múmkin, biz sizdi kútemiz. Meniń jeke nómirim ashyq jarııalanǵan, Sizder áleýmettik jelilerde jazyp jatqan ár habarlamany oqımyn. Osyǵan deıin jazǵanymdaı, dál qazir biz 100-den asa erekshe joǵary ball (20+ baldan 90+ balǵa deıin) jınaǵan talapkerlerdiń beınejazbasyn qosymsha tekseristen ótkizip jatyrmyz. Ereje buzýshylyqtyń arqasynda qol jetken búkil nátıje joıylady» dep atap ótti ortalyq dırektory.