UBT: Bıyl grant konkýrsyna ótinish 13-20 shilde aralyǵynda qabyldanady

<p>ASTANA. KAZINFORM - Negizgi Ulttyq biryńǵaı testileýdiń nátıjesi boıynsha talapkerlerden grantqa qujat qabyldaý 13 shildede bastalady.</p>

«Talapkerler ótinishin EGov arqyly onlaın formatta nemese JOO-lardyń qabyldaý komıssııalary arqyly oflaın formatta tapsyra alady. Qujattardy qabyldaý kez kelgen JOO (ornalasqan jeri boıynsha) arqyly júzege asyrýǵa bolady. Shalǵaı óńirlerden kelgen talapkerlerge yńǵaıly bolý úshin joǵary jáne joǵary oqý ornynan keıingi bilim berý uıymdarynda Vırtýaldy qabyldaý komıssııalary jumys isteıdi. Olar beınebaılanys arqyly keńes beredi jáne konkýrsqa qujattardy tapsyrýǵa kómektesedi. Bilim berý grantyn taǵaıyndaý konkýrsyna qatysý úshin eń tómengi upaılar Ulttyq testileý ortalyǵynyń saıtynda jazylǵan», — dep málim etti  Agenttik tilshisiniń saýalyna oraı Ǵylym jáne joǵary bilim mınıstrliginiń baspasóz qyzmetinen. 

Memlekettik bilim berý granttaryn taǵaıyndaý konkýrsyna qatysýǵa qujattardy elektrondy túrde tapsyrý úshin talapkerlerge myna qujattar qajet:

1. jeke kýálik;

2. UBT sertıfıkaty;

3. 3×4 kólemindegi foto;

4. orta bilim týraly attestat (tehnıkalyq jáne kásiptik bilim berý (TjKB) uıymdarynyń túlekteri úshin dıplom);

5. № 075/ý nysanyndaǵy medıtsınalyq anyqtama jáne № 063/ý nysanyndaǵy profılaktıkalyq ekpeler kartasy;

6. er jigitter úshin áskerı tirkelý kýáligi;

7. jeńildetilgen sanat boıynsha konkýrsqa qatysý úshin rastaıtyn qujattar.