UBT beınejazbalary tamyzdyń sońyna deıin qaralyp, talap buzǵandar jazasyz qalmaıdy

PETROPAVL. QazAqparat – Petropavlda M.Qozybaev atyndaǵy Soltústik Qazaqstan memlekettik ýnıversıteti negizinde Ulttyq biryńǵaı testileý bastaldy, dep habarlaıdy QazAqparat tilshisi.

Qabyldaý komıssııasynyń málimetinshe, joǵary oqý orny osy maqsatqa 13 aýdıtorııa bóldi. Karantındik jaǵdaıdy eskere otyryp, áleýmettik ara qashyqtyq saqtaldy, ár aýdıtorııada 10-15 adamnan aspaıdy.

«Mınıstrlik tarapynan kelgen jáne barlyq sanıtarlyq-epıdemıologııalyq nusqaýlyqtardy saqtaı otyryp, búgin mektep túlekteri úshin Ulttyq biryńǵaı testileý bastaldy. 1629 adam UBT-ǵa qatysýǵa nıet bildirdi. Onyń ishinde 1190-y bıylǵy jyldyń túlekteri, qalǵany ótken jyldyń mektep túlekteri men bıylǵy kolledj bitirýshiler. Jalpy testileý 10 kúnge sozylady, 4 shildege deıin ótedi. Búgin 178 talapker test tapsyrdy», - deıdi qabyldaý komıssııasy jaýapty hatshysynyń orynbasary Almas Kenjeǵalın.

UBT-nyń bıylǵy taǵy bir ereksheligi – qolǵa eshqandaı sertıfıkat berilmeıdi, bári elektrondy bolady. Barlyq ótinishter onlaın qabyldanady.

«UBT protsesi - abıtýrıentter ǵımaratqa kirgennen bastap shyqqanǵa deıin tolyq beınekameraǵa túsiriledi. Beınejazbalar 25 tamyzǵa deıin qaıta qaralyp, zerdeleneýi múmkin. Tyıym salynǵan zatty ótkizý sııaqty qandaı da bir faktiler anyqtalatyn bolsa, talapkerdiń konkýrsta utyp alǵan granty joıylýy múmkin», - deıdi Almas Kenjeǵalın.

Petropavlda UBT alǵashqy kún talapty buzǵandar anyqtalǵan joq.

Jalpy SQO-da UBT 21 maýsym kúni aýdan ortalyqtarynda bastaldy. Buǵan deıin eki túlektiń testileýge telefon kirgizip, saldarynan test nátıjeleriniń joıylǵandyǵy jóninde aıtqan edik.