UBT: Beınetranslıatsııa óship qalǵan aýdıtorııa túlekteri testileýdi qaıta tapsyrady
«UBT-nyń tórtinshi kúni 77 testileý pýnktinde 12 581 adam qatysady dep josparlandy. Onyń 96%-y test tapsyrdy. Erejeni 136 adam buzǵan, bul kórsetkish - úshinshi lektiń qorytyndysymen salystyrǵanda áldeqaıda tómen. Toǵyz túlektiń qyzýy kóterildi, olar UBT-ny basqa kúni tapsyra alady», - dep habarlady mınıstrliktiń baspasóz qyzmeti.
Sonymen birge, emtıhandy ótkizý protsesin baqylaýdyń nashar bolýyna baılanysty bilim salasyndaǵy sapany qamtamasyz etý boıynsha aýmaqtyq departamentter men Arnaıy baqylaý toby ókilderiniń usynysymen eki aımaqtaǵy memlekettik komıssııa quramynan 20 adam shyǵaryldy.
«Memlekettik komıssııalardyń jańa músheleri retinde qoǵam qaıratkerleri, oblystyń belsendi muǵalimderi, BAQ jáne úkimettik emes uıymdardyń ókilderi bekitildi. Sondaı-aq testileý ótkizý pýnkterindegi baqylaýdy kúsheıtý maqsatynda UBT ótkizýde syn-qater múmkin óńirlerge Ulttyq testileý ortalyǵynyń ókilderi jiberiledi», - deıdi mınıstrlik.
Túrkistan oblysynda ornalasqan eki pýnktide (Sháýildir aýyly, Jetisaı qalasy) jáne Shyǵys Qazaqstan oblysyndaǵy eki pýnktide (Aıagóz qalasy, Aqsýat aýyly) uıaly baılanys sıgnaldaryn tejeýishterdiń isten shyǵýyna jáne beınetranslıatsııanyń óshýine baılanysty emtıhandar basqa kúnge aýystyryldy.
QR BǴM Ulttyq testileý ortalyǵy dırektorynyń orynbasary Naýjan Dıdarbekovanyń málimdeýinshe, bul pýnkterde talapkerler 27 maýsym (Aıagóz q., Aqsýat a., Sháýildir a.) jáne 2 shilde kúnderi (Jetisaı q.) testileýdi tapsyrý múmkindigine ıe bolady jáne bilim berý granttaryn taǵaıyndaý konkýrsyna qatysa alady.
Esterińizge salaıyq, bıyl mektep bitirýshiler memlekettik emtıhandardy tapsyrýdan bosatyldy, talapkerlerge kalkýlıator paıdalanýǵa ruqsat berildi, sondaı-aq testileý ýaqyty uzartyldy.