UBT-2023: Beınejazba materıaldary 31 qazanǵa deıin taldanady

ASTANA. QazAqparat – Ulttyq testileý ortalyǵynyń dırektory Rýslan Emelbaev ortalyq kommýnıkatsııalar qyzmetinde ótken brıfıngide bıylǵy UBT nátıjeleri 31 qazanǵa deıin tekseriletinin aıtty, dep habarlaıdy QazAqparat tilshisi.

«UBT ótkizý barysynda 402 talapker smartfon, shpargalka jáne basqa da tyıym salynǵan zattardy alyp ótý áreketi saldarynan test tapsyrý múmkindiginen aıyryldy.

Testileý kezinde erejelerdi buzǵany úshin aýdıtorııadan 312 adam shyǵarylyp, olardyń nátıjeleri joıyldy. Keıbir testilenýshilerden jasyryn kameralar, mıkroqulaqqaptar, smartfondar jáne basqa da tyıym salynǵan zattar tabyldy.

Sonymen birge biz barlyq beınejazbaǵa 2023 jylǵy 31 qazanǵa deıin taldaý jasaımyz. Eger tyıym salynǵan zattardy paıdalaný faktileri anyqtalsa, talapker bilim berý grantynan aıyrylady», - dedi ol.

Ortalyq dırektory bul norma 2020 jyly alǵash ret qoldanyla bastaǵanyn eske saldy.

«2020 jyly beınejazbalardy qaıta qaraý nátıjesinde 152 testilenýshiniń, 2021 jyly 52 adamnyń, 2022 jyly 217 adamnyń nátıjesi joıylǵan bolatyn. Bıyl da bul jumys qolǵa alyndy. UBT-ǵa daıyndyq jáne tapsyrý barysynda biz talapkerlerdi birneshe ret akademııalyq adaldyqqa shaqyrdyq. Bul olarǵa bolashaqta jaqsy maman bolýǵa múmkindik beredi. Ótkizý formaty, ýaqyty ózgerissiz qaldy. Elektrondy formatqa kóshkennen beri appelıatsııa berý rásimi jeńildedi.

Ótken jyldar sııaqty appelıatsııany kelesi kúni emes, úmitkerler testileý aıaqtalǵannan keıin 30 mınýt ishinde bere alady. Negizgi UBT-2023 barysynda 50 myńnan astam ótinish kelip tústi, onyń ishinde 805 ótinish qanaǵattandyryldy. Aıta ketý kerek, UBT shtattyq rejımde ótti», - dedi Rýslan Emelbaev.