UBT-2018: Qostanaılyq 3 oqýshy aǵylshyn tilinde synaq tapsyrdy

QOSTANAI. QazAqparat - Qostanaı oblysyndaǵy 277 jalpy bilim beretin orta mektep UBT-ǵa qatysty. Bul týraly oblys ákimdiginde ótken jıynda aıtyldy, dep habarlaıdy QazAqparat.

Elimiz boıynsha UBT tolyqtaı aıaqtalmaǵanymen, Qostanaı oblysynyń kórsetkishteri belgili boldy.

Oblystyq bilim basqarmasynyń basshysy Bátıma Daýmovanyń sózinshe,  osy jyly bilim naýqanyna oblystyń 2858 túlegi qatysty. Bul byltyrǵy kórsetkishten 5,6%-ǵa artyq. Onyń ishinde 1396 túlek - memlekettik tilde, al 1459-y orys tilinde tapsyrdy.  Jalpy, óńirdegi 311 mekteptiń 277-si ulttyq testileýge qatysýǵa ótinim berdi. Bastysy, bilim sapasy jaman emes.

Oblys túlekteriniń testileýdegi ortasha baly - 86,7. Bul 2017 jylǵy kórsetkishten 4,8 balǵa kóbirek. Al UBT-nyń Respýblıkadaǵy ortasha kórsetkishi qazir 83 baldy qurap otyrǵany málim. Rýdnyı, Arqalyq qalalary jáne Amankeldi, Taran, Jankeldın, Altynsarın aýdandary UBT-daǵy deńgeılerin jaqsartty. Áýlıekól aýdanyndaǵy Kóktal orta mektebi men Amankeldi aýdanyndaǵy Amankeldi orta mektebi oblys boıynsha úzdik nátıje kórsetti. Atalǵan aýdandardaǵy synaqtyń ortasha upaıy, tıisinshe, 111,8 jáne 110,9 boldy. Testileý kórsetkishi Naýyrzym, Qarabalyq, Sarykól, Fedorov aýdandarynda tómen, - dedi basqarma basshysy.

Bıylǵy jyldyń basty jańalyǵy - 3 oqýshy synaqty aǵylshyn tilinde tapsyrdy. Olardyń ortasha upaıy - 97. Aıta keteıik, elimizde nebári 7 túlek aǵylshyn tilinde testileýden ótken bolatyn. Sondaı-aq, 142 «Altyn belgi» ıegeriniń 26-sy UBT-ǵa qatysqan joq. Olardyń ony Qostanaı qalasynyń mektepterinde bilim aldy. «Altyn belgi» úmitkerleriniń 56%-y ǵana 100 balǵa ıe bolyp, bilimderin qorǵady. UBT nátıjesinde  Jankeldın aýdany Torǵaı orta mektebiniń túlegi Ajar Kenjebaı oblystaǵy eń joǵarǵy balǵa ıe boldy. Ol 140 suraqtyń 134-ne durys jaýap bergen. 133 ball alǵandardyń ishinde qostanaılyq Marjan Malkenova, Arqalyq túlegi Gúlim Jańalyq pen amankeldilik Erkebulan Jumaǵazın bar.

Arhımed Muhambetov UBT qorytyndysy boıynsha óńirdiń ońtústik aýdandarynyń jetistikterine toqtaldy. Oblys basshysy bilim sapasy tómen aýdandardyń ákimderine syn aıtty. A.Muhambetov  ınnovatsııalyq mektepterdiń basshylaryna da bilim berý sapasyn jaqsartýdy qolǵa alýdy tapsyrdy.

Eske salsaq, UBT 1 shilde kúni tolyqtaı aıaqtalady. Onyń qorytyndylary pedagogtardyń tamyz konferentsııasynda belgili bolady.