UBT: 1770 qaraǵandylyq túlek shekti mejeni eńsere almady

QARAǴANDY. QazAqparat – Qazaqstanda Ulttyq biryńǵaı testileý aıaqtaldy. 10 kúnge sozylǵan emtıhanǵa Qaraǵandy oblysynan 6 214 túlek qatysty, dep habarlaıdy QazAqparat tilshisi.

Bastapqyda 6 431 talapker ótinish bergen bolatyn.

Testileýge ártúrli sebeptermen 180 adam qatysa almady. Olarǵa kúzgi aǵymda UBT-ny qaıta tapsyrýǵa múmkindik beriledi.

Bıyl eń joǵary meje 140 balldyń 136-syn «Murager» oblystyq mamandandyrylǵan mektep-ınternatynyń túlegi Jaqan Ámirjan jınady.

Ulytaý №1 orta mektebiniń túlegi, «Altyn belgi» ıegeri Aıaýlym Tanabaeva 132 ball aldy.

Buqar Jyraý aýdany Úshtóbe aýylynyń orta mektebiniń túlegi Álıhan Jamanhan 131 ball jınady.

«Jalpy, Qaraǵandy oblysynda 410 túlek 100 baldan joǵary kórsetkishke qol jetkizdi. 1 770 túlek shekti deńgeıden óte almady.

Bıyl UBT-ǵa qatysqandardyń 1 266-sy – kolledj túlekteri jáne ótken jyldary mektepti bitirgender.

SOVID-19 pandemııasyna baılanysty barlyq 15 test tapsyrý pýnktinde sanıtarlyq tártip kúsheıtildi. Dezınfektsııalyq tonnelder, kilemsheler, teplovızorlar, sanıtaızerler ornatyldy, túlekterdi medıtsınalyq maskalarmen qamtamasyz etti.

Testileý pýnktteriniń janynda jedel járdem brıgadalary, medıtsına qyzmetkerleri men jergilikti polıtsııa qyzmetkerleri kezekshilik etti», - dedi oblys ákimdiginen.

Bıyl Qazaqstan boıynsha UBT tapsyrýǵa 131 754 ótinish tirkeldi. Onyń 92,1% testileýge qatysty. Shekti baldy 82 154 adam jınady.