UBT: 140 baldyq sertıfıkatqa ıe BQO-nyń eki túlegi otandyq JOO-ny tańdady

ORAL. QazAqparat – Oral qalasyndaǵy daryndy balalarǵa arnalǵan S.Seıfýllın atyndaǵy №11 oblystyq mektep-ınternatynyń eki túlegi Gúlshat Bekqalıeva men Áıgerim Qonar otandyq oqý ornyn tańdap otyr, dep habarlaıdy QazAqparat tilshisi.

BQO Bilim basqarmasynyń baspasóz qyzmetinen málim etkenindeı, qos túlekke QR Bilim jáne ǵylym mınıstrliginiń sheshimimen 140 baldyq kórsetkishpen sertıfıkat tabys etiletin bolady.

Ótken jylǵy UBT tapsyrýdaǵy basty jańalyq – SAT, ACT, IB halyqaralyq standarttalǵan testileriniń balyn Ulttyq biryńǵaı testileý balyna aýystyrý shkalasy engizilgen edi.

Eger túlek SAT reasoning jáne SAT subject sertıfıkattaryn UBT pýnktinde tapsyrǵan bolsa, sol sertıfıkattary UBT baly retinde kórsetiledi. Túlekter UBT-dan bosatylyp, grant berý konkýrsyna qatysa alady.

Mine, G.Bekqalıeva men Á.Qonar halyqaralyq standarttalǵan test tapsyryp, eń joǵary upaı jınaǵan. 650 baldan joǵary upaı jınaǵan eki túlekke de UBT-nyń eń joǵary 140 baly berildi.

Olardyń ekeýi de – Nazarbaev Ýnıversıtetiniń «FOUNDATION» baǵdarlamasy boıynsha grant ıegeri. Sonymen qatar Gúlshat «Altyn belgiden», Áıgerim úzdik attestattan úmitker.

G.Bekqalıeva 7-synyptan bastap fızıka-matematıka baǵytynda bilim alǵandyqtan, ınjenerııa mamandyǵyn tańdaǵan. Ol Nazarbaev Ýnıversıtetinde «Qurylys jáne ekologııalyq ınjenerııa» fakýltetinde bilim alǵysy keledi.

Al Á.Qonar bolashaqta IT, robot tehnıkasy salasynda qyzmet etýdi armandaıdy.

Eske sala keteıik, budan buryn Batys Qazaqstan oblysynda 430 oqýshynyń «Altyn belgige» úmitker ekendigin jazǵan bolatynbyz.