Ýálıhanovtardyń atadan qalǵan mekeni - Soltústik Qazaqstannyń kıeli jeri
«Syrymbet» mekeni 19 ǵasyrǵa tıesili aǵash sáýletiniń eskertkishi. Ol Syrymbet aýylynan úsh shaqyrym qashyqtyqtaǵy kórkem tabıǵatty qaraǵaıly tóbeshikterdiń ortasynda ornalasqan. Ol tutas aýyldy dala jelinen qorǵap turady. Ýálıhanovtar úı-jaıy syrtynan qaraǵanda 19 ǵasyrdaǵy orys dvorıandarynyń mekenin eske salady. Solaı bolatyny zańdy da. Óıtkeni, úı-jaı ımperator birinshi Aleksandrdyń 1824 jyldyń 30 sáýirindegi buıryǵy boıynsha, Ýálı hannyń jesiri, Abylaı hannyń kelini jáne Shoqannyń ájesi Aıǵanymǵa arnalyp salynǵan.
Bul jerde belgili ǵalymnyń balalyq shaǵy ótti, ol Ombydaǵy kadet korpýsynan osy jerge demalysqa keletin. Syrymbette bul úıden basqa, meshit, mektep, dıirmen, qyzmetshilerge arnalǵan úı, monsha jáne basqa da sharýashylyq oryndary bar.
«Aıǵanymnyń úıi aǵartýshylyq oılardyń taraýynda úlken mańyzǵa ıe boldy. Bul jerde aıtystar uıymdastyrylyp, belgili kompozıtorlar, aqyndar men ánshiler óner kórsetken», - dedi mádenıet basqarmasynyń qyzmetkerleri.
«Syrymbet» úı-jaıy órkendeýdi de, quldyraýdy da kórdi. 1917 jylǵa qaraı, ol tutastaı buzyldy. Keńestik bılik onyń materıaldaryn basqa ǵımarattardyń qurylysyna paıdalandy. 1993 jyl úı-jaıdyń ekinshi ret dúnıege kelgen jyly boldy. Sol jyly QR Úkimetiniń tarıhı eskertkishti qaıta qurý týraly qaýlysy jarııalandy. Úı-jaı Shoqannyń týǵanyna 150 jyl tolýy qarsańynda tolyqtaı qalpyna keltirildi. 1995 jyly Ýálıhanovtardyń mıras bolyp qalǵan jerine Qazaqstan, Ózbekstan jáne Qyrǵyzstan prezıdentteri keldi.
Jyl saıyn «Syrymbet» aýylynda Shoqan Ýálıhanovtyń ómiri men eńbegine arnalǵan ádebı sharalar ótkizilip, dárister oqylady.
Foto primeminister.kz