Ýaqytynda qabyldanǵan sheshimder koronavırýstyń taralýyna jol bermedi - Ǵalymqaıyr Mutanov
Ýnıversıtet rektory Ǵalymqaıyr Mutanov Prezıdent málimdemesiniń álemdik aýqymdaǵy eń mańyzdy máselege der kezinde jáne qajetti sátinde jasalǵanyn, koronovırýs pandemııasynyń barlyǵymyz úshin aýyr synaq bolyp otyrǵanyn aıta kele ýaqytynda qabyldanǵan sheshimderdiń nátıjesinde maqsatty baǵytta atqarylǵan júıeli jumystar asa qaýipti indettiń jappaı taralyp ketýine jol bermegenin eske saldy. Pandemııa álemniń keıbir elderindegideı geometrııalyq progressııamen kóbeıip otyrǵan joq.
«Jartykesh sharalar esh ýaqytta tıimdi nátıje bermeıdi, sondyqtan, sabyrlylyq pen shydamdylyq tanytyp, bastalǵan isti tolyǵymen sátti aıaqtaý kerek. Atqarylyp jatqan júıeli áreketter jáne ekonomıkany qalypty arnaǵa salý, aýyl sharýashylyǵy men bızneske qarjylaı qoldaý kórsetý, turǵyndarǵa áleýmettik kómek kórsetý, dárigerler men koronovırýsqa qarsy kúrestiń alǵy shebinde júrgen ózge de qyzmetkerlerdiń qalypty jumys isteýine jaǵdaı jasaýdyń naqty tapsyrmalaryn júzege asyrý jaqsy nátıjelerin berip jatyr», - dep atap ótti rektor.
Ǵ. Mutanov sonymen qatar, tap bolǵan jaǵdaıdan sabaq alý jáne durys qorytyndy shyǵaryp, soǵan oraı óz qyzmetińdi jedel ári jańasha úılestirý qajet ekendigin de atap ótti.
«Biz aldaǵy kúnderde kezdesetin jańa talaptar men qaterlerdi eskere otyryp, ekonomıkanyń, memlekettik basqarý júıesiniń, densaýlyq saqtaý jáne bilim berý salalarynyń tutastaı jáne aýqymdy túrde jańǵyrtylýyna daıyn bolýymyz kerek», - dedi elimizdiń kóshbasshy ýnıversıtetiniń jetekshisi.
Talqylaý barysynda sóılegender karantınniń oqytýshylardyń jáne stýdentter men magıstranttardyń shyǵarmashylyq izdenisterine, keleshegi bar tyń ǵylymı jobalardy, jańa ıedeıalardy júzege asyrýyna, sonymen birge, qashyqtan oqytýdyń zamanaýı tehnologııalaryn paıdalanýdyń ozyq tájirıbelerin úırenýine múmkindik berip otyrǵanyn atap ótti. Rasynda, QazUÝ alǵashqy bolyp jáne eshbir qıyndyqsyz tolyqtaı qashyqtan oqytý júıesine birden aýysqan bolatyn. Qazir ýnıversıtet osy formatty stýdentterge barynsha tıimdi de qolaıly etip, emtıhan qabyldaýǵa daıyn.
Onlaın talqylaýǵa qatysýshylar Prezıdent Q.Toqaevtyń bastamalaryn tolyǵymen qoldady jáne elmizdiń bul aýyr synaqtan aman ótip, burynǵydan da qýatty bolyp shyǵatynyna senim bildirdi.
QazUÝ-dyń ǵalymdary men oqytýshylary árbir azamatty 11 mamyrǵa deıin shegerilgen Tótenshe jaǵdaı merziminde sanalylyq pen jaýapkershilik tanytyp, jaǵdaıdyń ózi májbúrlep otyrǵan tyıymdarǵa túsinistikpen qaraýǵa, sondaı-aq, qasıetti Ramazan aıynda jáne alda kele jatqan meıram kúnderinde jaqyndaryna, otbasyna kóbirek kóńil bólip, shyǵarmashylyqpen aınalysýǵa, ózin ózi jetildirýge kúsh salýǵa shaqyrdy.