Ýaqytsha Prezıdent ókilettigi qandaı tártippen beriledi

ASTANA. QazAqparat - Prezıdenttiń ókilettigi merziminen buryn toqtatylǵan jaǵdaıda onyń ókilettiginiń merzimi ýaqytsha Senat tóraǵasyna beriledi. Bul týraly QR Tuńǵysh Prezıdenti - Elbasy Nursultan Nazarbaev Qazaqstan halqyna arnalǵan málimdemesinde aıtty, dep habarlaıdy QazAqparat.

«Qazaqstandaǵy bılik sabaqtastyǵy konstıtýtsııalyq turǵydan rettelgen. Prezıdenttiń ókilettigi merziminen buryn toqtatylǵan jaǵdaıda onyń ókilettigi qalǵan merzimi aıaqtalǵanǵa deıin Senat tóraǵasyna beriledi. Sodan keıin jańa Prezıdent saılaýy bolady», - dedi Nursultan Nazarbaev.

Qazir Parlament Senatynyń tóraǵasy - Qasym-Jomart Kemeluly Toqaev.

«Ony sizder jaqsy bilesizder. Ol Máskeý memlekettik halyqaralyq qatynastar ınstıtýtynyń túlegi, ǵylym doktory. Aǵylshyn jáne qytaı tilderin erkin meńgergen. Basshylyq laýazymdarda qyzmet etip, mol tájirıbe jınady. Elimizdiń syrtqy saıasatynyń qalyptasý jyldarynda Syrtqy ister mınıstri, Premer-Mınıstrdiń orynbasary jáne Premer-Mınıstr, Senat Tóraǵasy boldy. Elimizdi, onyń ekonomıkasy men saıasatyn jetik biledi», - dedi Elbasy.

Qasym-Jomart Toqaev Birikken Ulttar Uıymy Bas hatshysynyń orynbasary bolyp jumys istedi. Bul - onyń dıplomat retinde sińirgen eńbeginiń jáne Qazaqstanǵa degen zor senimniń jemisi.

«Ol Qazaqstan táýelsizdiginiń alǵashqy kúnderinen bastap menimen birge jumys istep keledi. Men ony jaqsy bilemin. Ol - adal ári jaýapkershiligi joǵary azamat. Elimizdiń ishki jáne syrtqy saıasatyn jan-jaqty sezinedi. Ol barlyq baǵdarlamalardy ázirleýge jáne qabyldaýǵa atsalysty. Qasym-Jomart Kemeluly Qazaqstandy basqarýǵa naǵyz laıyqty azamat dep senemin», - dep óz sózin túıindedi N. Nazarbaev.