Ýaqtyly egin jınaý, qurylys maýsymyn tıimdi júrgizý – Ekonomıka mınıstri ákimdikterge keńes berdi

ASTANA. QazAqparat – QR Ulttyq ekonomıka mınıstri Álibek Qýantyrov ekonomıkalyq ósýdi qamtamasyz etý úshin qandaı sharalar jasaý keregin aıtty, dep habarlaıdy QazAqparat tilshisi.

«Barlyq 7 ekonomıkalyq kórsetkish boıynsha oń ósý 6 óńirde – Abaı, Aqmola, Batys Qazaqstan, Qostanaı oblystarynda, sondaı-aq Almaty jáne Shymkent qalalarynda baıqaldy. Ekonomıkalyq ósýdi qamtamasyz etý maqsatynda ortalyq jáne jergilikti atqarýshy organdarǵa birneshe sharaǵa nazar aýdarý usynylady», - dedi UEM basshysy búgingi Úkimet otyrysynda.

Mınıstrdiń aıtýynsha, ýaqytyly egin jınaýdy jáne qurylys jumystarynyń maýsymyn tıimdi júrgizýdi qamtamasyz etý qajet.

Sonymen birge, belsendi túrde ınvestıtsııalar tartý, ınvestıtsııalyq jobalardyń ekonomıkalyq turǵyda tıimdiligin arttyrý mańyzdy.

«Otandyq eksportty jetkizýdiń úzdiksizdigin qamtamasyz etý jáne tasymaldaý men logıstıkadaǵy máselelerdi sheshýge járdemdesý kerek. Áleýmettik mańyzy bar azyq-túlik taýarlary baǵalaryn baqylaý jáne tıisti turaqtandyrý sharalaryn qabyldaý qajet. Turaqty jáne ýaqytsha jumyspen qamtý sharalaryn qoldaý arqyly eńbek naryǵyndaǵy turaqtylyqty qamtamasyz etken jón», - dedi Álibek Qýantyrov.

Buǵan deıin mınıstr Qazaqstannyń 15 aımaǵynda óńdeý ónerkásibi kórsetkishteri artqanyn baıandaǵan edi.

Sondaı-aq, bıylǵy jartyjyldyq qortyndysy boıynsha, Qazaqstan ekonomıkasynyń ósý qarqyny 5% qurady.