TJM: Jarylys bolǵan qoımada 500 tonnadan astam trotıl bolǵan

NUR-SULTAN. QazAqparat – QR Tótenshe jaǵaılar mınıstrligi Jambyl oblysynyń Korolevka kentindegi áskerı qoımada bolǵan jarylys týraly tyń málimetter usyndy, dep habarlaıdy QazAqparat tilshisi.

Mınıstrliktiń baspasóz qyzmeti taratqan málimet boıynsha, tótenshe oqıǵa kezinde jalpy aýdany 697 sharshy metr bolatyn qoıma ǵımaratyn jalyn sharpyǵan.

«Jaryqshaqtardyń ushý radıýsy 2 shaqyrymǵa deıin jetti. Qazirgi málimet boıynsha, qoımada 500 tonnadan astam trotıl saqtalǵan. Taǵy bir málimet boıynsha aýrýhanaǵa 90-ǵa jýyq adam túsken. Onyń 49-y tótenshe jaǵdaılar departamentiniń qyzmetkerleri», - dep jazzylǵan resmı derekte.

Aıta keteıik, 26 tamyz kúni saǵat 19:00-de Jambyl oblysynyń Baızaq aýdanynda ornalasqan áskerı bólim qoımalarynyń birinen órt shyǵyp, jarylys boldy.

Sońǵy resmı derekter boıynsha, Jambyl oblysyndaǵy jarylystan 4 áskerı qyzmetshi qaza tapqan.

«Eń aldymen osy apatta, órt sóndirý barysynda qaza tapqan 4 áskerı qyzmetshiniń jaqyn týystaryna kóńil aıtamyz jáne jaraqattanǵan qyzmetshilerge tezirek saýyǵyp ketýlerin tileımiz», - dedi QR Qorǵanys mınıstri Jambyl óńirlik kommýnıkatsııalar qyzmetinde ótken baspasóz máslıhatynda.

Jambyl oblysy ákiminiń baspasóz qyzmeti aýrýhanada jarylystan zardap shekken 27 adam jatqanyn habarlady. Onyń altaýynyń jaǵdaıy aýyr. Jalpy aýrýhanaǵa 88 adam júgingen.

Prezıdent Qasym-Jomart Toqaev Twitter-de Jambyl oblysyndaǵy jaǵdaı baqylaýǵa alynǵan jazǵan bolatyn.