TJM Jańaózendegi jarylys týraly: Biz 28 metrden bıik úılerdi ǵana teksere alamyz

ASTANA. QazAqparat – Tótenshe jaǵdaı qyzmetiniń ókilderi 28 metrden bıik úılerdi ǵana kirip tekserýge quzyretti. Órtke qarsy qyzmet komıtetiniń tóraǵasy Nurbolat Derbisov ortalyq kommkýnıkatsııalar qyzmetinde ótken brıfıngide osylaı dep málim etti, dep habarlaıdy QazAqparat tilshisi.

«Jarylys bolǵan úı sońǵy ret qashan tekserilip edi? Zardap shekkenderge qandaı ótemaqy beriledi?» dep surady jýrnalıst.

Nurbolat Derbisovtiń sózinshe, tótenshe jaǵdaı qyzmeti kez kelgen turǵyn úıdi teksere almaıdy.

«Óıtkeni Konstıtýtsııalyq zań boıynsha bizdiń eshqandaı turǵyn úıge kirýge quqyǵymyz joq. Biraq buǵan deıin jyl saıyn kúz ben kóktemde órtti baqylaý aılyǵyn ótkizemiz. Ásirese kúzde jylytý maýsymynyń aldynda úı-úıdi aralaımyz. Bizdiń qyzmettiń krıterııi boıynsha 28 metrden bıik úılerdi ǵana tekserýge qaqymyz bar», - dedi ol.

Mınıstrlik ókili apattan úısiz qalǵan adamdarǵa ótemaqy tóleý máselesi jergilikti ákimdiktiń quzyrynda ekenin aıtty.

«Ótemaqy máselesi boınysha qazirgi tańda oblys ákimi jumys istep jatyr. Úısiz qalǵan barlyq azamat úımen jabdyqtalady degen málimet aldyq. Onyń tolyq aqparatyn qurylǵan komıssııanyń sheshiminen keıin aıtsaq dep otyrmyz. Óıtkeni ol ótemaqymen qamtý máselesi jergilikti ákimdikterdiń quzyretinde bolǵandyqtan tolyq málimet bere almaımyn», - dedi Nurbolat Derbisov.