TJM záýlim ǵımarattarda órt sóndiretin drondar satyp almaqshy

<p>ASTANA. KAZINFORM &ndash; Tótenshe jaǵdaılar mınıstri Shyńǵys Árinov Úkimet otyrysynda órt sóndirý qyzmetin jetildirý baǵytyndaǵy tyń jobalardy atady.&nbsp;</p>

«Aqmola oblysynda pılottyq joba aıasynda órt sóndirýshilerden, dárigerler men qutqarýshylardan turatyn ámbebap bólimshe quryldy. Bul zardap shekkenderdi jedel túrde keshendi qutqarý men olarǵa alǵashqy kómek kórsetý múmkindigin beredi. Órt sóndirý bólimshelerin salý tásili qaıta qaraldy. Naqtyraq aıtqanda, tamyz aıynan bastap Astanada 3,5 aıdyń ishinde jyldam turǵyzylatyn konstrýktsııalardan salynǵan órt sóndirý bólimshesi jumys isteıdi. Barlyq óńirde qurylystyń osyndaı tásili engiziletin bolady. Jalpy, bizdiń elimizge 121 órt sóndirý deposy qajet», - dedi mınıstr. 

Vedomstvo basshysy jyl basynan beri TJM qajettiligi úshin 728 tehnıka alynǵanyn aıtty.

«Bıik ǵımarattardy sóndirýge arnalǵan órtke qarsy eki dron materıaldyq-tehnıkalyq qamtamasyz etýdi nyǵaıtý sheńberinde alǵash ret satyp alynady. Bıyl respýblıkalyq, jergilikti bıýdjet esebinen jáne lızıng arqyly 728 birlik arnaıy avtotehnıka men 18 myńnan astam qural-jabdyqtar satyp alýdamyz. Eń aldymen, tehnıkany aýdandyq bólimshelerdiń muqtajdyǵyna bólemiz», - dedi Shyńǵys Árinov.