TJM tártipsizdikter týraly: Órt sóndirý kólikterine 33 ret shabýyl jasaldy

NUR-SULTAN. QazAqparat – QR Tótenshe jaǵdaılar mınıstrliginiń baspasóz qyzmeti eldegi tártipsizdikter kezinde órt sóndirý bólimshelerine 33 ret shabýyl jasalǵanyn málim etti, dep habarlaıdy QazAqparat tilshisi.

«Elimizdiń keıbir aımaqtarynda bolǵan tártipsizdikter barysynda adamdardyń ómiri men múlkin ottan qutqarýǵa mindetti órt sóndirý qyzmetiniń qarýsyz bólimshelerine jalpyadamzattyq qundylyqtar men moral normalaryn buza otyryp, shabýyl jasaldy.

Búkil álemde, tipti áskerı qaqtyǵystar kezinde de qutqarýshy, dáriger sııaqty mamandyq ıeleri óz qyzmetin qaqtyǵysýshy taraptardyń qorǵaýymen júzege asyrady.

Órt sóndirý avtokólikterine shabýyl jasalǵan 33 jaǵdaı tirkeldi. Tártipsizdikterge qatysýshylar órt sóndirýshilerge tas laqtyryp, oq jaýdyrdy, kólikterdiń jolyn jaýyp tastady», - dep jazylǵan mınıstrliktiń málimetinde.

Soǵan qaramastan, órt sóndirýshiler men qutqarýshylar kásibı mindetterin barynsha múltiksiz oryndaýǵa tyrysqan.

«Qyzmettik mindetterin oryndaý kezinde Tótenshe jaǵdaılar mınıstrliginiń 10 qyzmetkeri ártúrli jaraqat alyp, arasnyda oq tıgenderi de bar. Shabýyldardyń kesirinen 29 órt jáne qutqarý tehnıkasy zaqymdandy. Onyń ishinde 5 avtotsısterna túgel janyp ketti.

Týyndaǵan qaýip-qaterge qaramastan, 75 órt sóndirilip, 143 adam qaýipti aımaqtardan qutqarylyp, evakýatsııalandy. Óńirlerdiń bárinde TJM kezekshi qyzmetteri úzdiksiz jumys istep, órt týraly habarlamalardy qabyldap otyrdy. Órt sóndirýshiler kelip túsken shaqyrtýlarǵa tıisti tártip boıynsha shyǵyp otyrdy», - dep jazylǵan mınıstrliktiń baspasóz qyzmeti usynǵan málimette.