TJM sý tasqynyna daıyndyq sharalaryn qalaı júrgizip jatyr
Halyqty jáne ınfraqurylymdy kóktemde ózenderdiń arnasynan asýyna baılanysty qaýipterden qorǵaý úshin kóptegen is-sharalar qolǵa alyndy.
Sý tasqynynyń yqtımal saldaryn boldyrmaý maqsatynda jergilikti atqarýshy organdar tótenshe jaǵdaılar departamentterimen birlesip, qorǵanys bógetteri men bilikterin turǵyzý, sý burý arnalary men aryqtardy qurý, sondaı-aq jańa jańbyr sýynyń júıeleri men sý ótkizý qurylystaryn salyp jatyr.
Sonymen birge, TJM qyzmetkerleri 2025 jylǵy sý tasqynyna qarsy is-sharalardy iske asyrý boıynsha óńirlerdiń daıyndyǵyn tekserip jatyr.
Qaraǵandy oblysynda sý tasqyny kezeńine daıyndyq jumystary aıaqtaldy jáne jalpy 180 ınjenerlik is-shara júrgizildi. Onda 65 km qorǵanys bógetteri men bilikteri turǵyzylyp, nyǵaıtyldy, 18 shaqyrymnan astam ózen arnalarynyń qaýipti ýchaskelerine sanatsııa júrgizildi, 26 km drenajdyq jáne sý burý júıeleri tazartyldy. Avtojoldardyń 75 ýchaskesinde sý ótkizý qabileti artty.
Qazirgi ýaqytta oblysta materıaldyq-tehnıkalyq, janar-jaǵarmaı, azyq-túlik, ınertti materıaldar jáne qapshyqtar rezervi quryldy. Eldi mekenderden qar shyǵarý jumystary jandandyryldy. Sý ótkizý qubyrlaryn tazartý, kanaldar men transheıalardy qazý, sondaı-aq tasqyn sý tógindilerin avtomatty tazartý jumystary aqpan aıynda bastalady.
Aqtóbe oblysynda 2025 jylǵy sý tasqynyna daıyndyq maqsatynda ınjenerlik jumystar josparyn oryndaýǵa erekshe nazar aýdarylǵan. Jospardaǵy sý tasqynyna qarsy 104 is-shara iske asyryldy, taǵy 31 shara júrgizilip jatyr.
Mamandar Shyǵys Qazaqstan oblysy Glýbokoe aýdanyndaǵy ózenderde muz keptelisteri men seńniń júrýin tekserdi. Aýdan aýmaǵyn tolyǵymen qar basqan. Aerovızýaldy monıtorıng sý tasqyny boljamyn barynsha tıimdi jasaýǵa múmkindik beredi. Qazirgi ýaqytta muz keptelisteri men seńniń júrýi baıqalmaıdy. Glýbokoe aýdanynda taýly aımaqtaǵy qar jamylǵysynyń bıiktigi 60 sm-ge jetedi. Munda 26 kóshkin qaýpi oshaǵy bar. Jaqynda qaýipsizdik maqsatynda «Óskemen-Gornaıa — Úlbi-Severnoe» avtojolynda kóshkinder profılaktıkalyq maqsatta túsirildi, nátıjesinde 2090 tekshe metr qar tústi.
TJM ókilderi Soltústik Qazaqstan oblysynyń Qyzyljar, Shal aqyn, Ǵ.Músirepov, Esil aýdandary men Petropavl qalasyn aralap shyqty. Onda 2024-2025 jyldarǵa arnalǵan ınjenerlik jumystar josparyn iske asyrýǵa basa nazar aýdaryldy, sý tasqynyna qarsy 90 is-shara oryndaldy, taǵy 19 shara boıynsha jumystar júrgizilýde.
Batys Qazaqstan oblysynda qorǵanys qurylystarynyń jaı-kúıine monıtorıng júrgizildi jáne Jaıyq sýynyń tasý qaýpi zertteldi. Sý tasqyny qaýipsizdigi úshin Terekti, Aqjaıyq, Báıterek aýdandarynda Jaıyq ózeniniń boıynda ornalasqan qorǵanys bógetteriniń jaı-kúıine tekserý júrgizildi.