TJM: Ótken táýlikte qar qursaýynan 259 adam qutqaryldy, onyń 30-y bala
«Ótken táýlikte elimizde qar qursaýynan 259 adam, onyń ishinde 30 bala qutqarylyp, 21 tehnıka shyǵaryldy. Qazirgi ýaqytta jylytý beketterinde 139 adam, onyń ishinde 14 bala bar. Blok beketterde 664 tehnıka, onyń ishinde 346 jeńil jáne 318 júk kóligi tur. Keshe keshke elimizdegi blok beketterde 1 400 kólik turǵan bolatyn», - delingen habarlamada.
Resmı aqparatqa súıensek, tótenshe jaǵdaıǵa tap bolǵan adamdardy qutqarý men qar tazartý jumysyna TJM, ІІM, jergilikti atqarýshy organdar men jol qyzmetterinen 232 adam jáne 134 birlik tehnıka jumyldyryldy.
«Aýa raıynyń nasharlaýyna baılanysty (boran, kórinýdiń shektelýi) Nur-Sultan qalasynda, Aqmola, Shyǵys Qazaqstan, Jambyl, Qaraǵandy, Qostanaı, Soltústik Qazaqstan, Almaty, Pavlodar jáne Túrkistan oblystarynda respýblıkalyq mańyzy bar avtojoldardyń 24 ýchaskesi men oblystyq mańyzy bar avtojoldardyń 42 ýchaskesi jabyldy», - deıdi mınıstrlikten.
Sondaı-aq, habarlamada Nur-Sultan qalasy jáne Aqmola, Qaraǵandy, Soltústik Qazaqstan, Pavlodar, Shyǵys Qazaqstan, Jambyl oblystarynda respýblıkalyq jáne aýmaqtyq jedel shtabtar qurylǵany aıtylǵan.
«Mınıstrlik azamattarǵa eldi mekennen shyqqan kezde qaýipsizdik erejelerin saqtaýǵa keńes beredi. Alys jolǵa shyǵar aldynda aýa raıy boljamymen tanysyp, avtokóliktiń tehnıkalyq jaı-kúıiniń durystyǵyna kóz jetkizgen abzal. Ózińizben birge qysyltaıań jaǵdaılarda kómektesetin barlyq qajetti zattardy alyp júrińiz», - degen keńes berildi.
Aıta keteıik, joldardyń jabylýy jáne aýa raıyna baılanysty eskertý týraly habardy «Dármen» mobıldi qosymshasy arqyly nemese qutqarý qyzmetiniń 112 biryńǵaı jelisi arqyly bilýge bolady.