TJM: Qarly burqasyn kezinde 1453 adam qutqaryldy, onyń 199-y - bala

NUR-SULTAN. QazAqparat – Otandyq qutqarýshylar qolaısyz aýa raıy saldarynan tótenshe jaǵdaıǵa tap bolǵan 1453 adamnyń qaýipsizdigin qamtamasyz etti, dep habarlaıdy QazAqparat tilshisi.

«Ózderińiz biletindeı, sońǵy kúnderi qolaısyz aýa raıy saldarynan bolǵan tótenshe jaǵdaıdy joıý jóninde respýblıkalyq shtab quryldy. Búginde Qaraǵandy, Atyraý, SQO Almaty oblysy jáne Nur-Sultan, Almaty qalasy boıynsha shtab óz jumysyn jalǵastyrýda. Sońǵy 2 kún ishinde respýblıkanyń 8 oblysynda avtojoldardyń 111 ýchaskesi boıynsha jol qozǵalysyna shekteý qoıyldy. Tótenshe jaǵdaı saldaryn joıý jáne qolaısyz aýa raıy saldarynan qıyndyqqa tap bolǵan turǵyndarǵa kómek kórsetý maqsatynda 40 jylytý beketi jumys istep, 1 121 tehnıka jumyldyryldy», - dedi TJM basshysy ıÝrıı Ilın Ortalyq kommýnıkatsııalar qyzmeti alańynda ótken baspasóz máslıhatynda.

Mınıstrdiń málimdeýinshe, «101» jáne «112» jelisi arqyly kómek suraǵan 7 myńnan astam habarlama kelip túsken.

«Búgin saǵat 11:00-degi jaǵdaı boıynsha respýblıkalyq mańyzy bar 2 jol ýchaskesi jáne oblystyq mańyzy bar 12 jol ýchaskesi boıynsha jol áli de jabyq. Joldy tazartý jumysy júrip jatyr jáne jaǵdaı baqylaýda. 29-30 naýryz kúnderi qutqarý bóliminiń mamandary 1453 adamdy, onyń ishinde 199 balany qutqaryp, evakýatsııalady», - deıdi ol.

Buǵan deıin atalǵan vedomstvo basshysy aýa raıynyń qolaısyzdyǵynan 8 oblysta 289 eldi mekenniń jaryqsyz qalǵanyn jetkizdi.