TJM evakýatsııalaý pýnkterinen ruqsatsyz shyqpaýǵa shaqyrdy

<p>ASTANA. KAZINFORM &ndash; Tótenshe jaǵdaılar mınıstrligi sý basqan óńirlerdiń turǵyndaryn úndeý jarııalady.</p>

«Sý tasqyny saldaryn joıý jáne onymen kúres, avarııalyq qutqarý jumystary jalǵasýda. Búginde 112 539 úı janýary qaýipsiz jerge aıdaldy. Sonymen qatar 9 mln 800 myńnan astam tekshe metr qar sýy soryldy, 2 mln 900 myń qap jáne 1 mln 400 myńnan astam ınertti materıaldar tóseldi. Aqtóbe, Qostanaı, Aqmola, Atyraý, SQO 5837 turǵyn úı, 1353 aýla aýmaǵy jáne 3124 saıajaı úıleri sý astynda qaldy. Avarııalyq qutqarý jáne sý tasqynyna qarsy jumystarǵa barlyǵy 46 417 adam jáne 4351 tehnıka, onyń ishinde 873 sý sorý, 308 júzý quraly jáne 16 áýe kemesi jumyldyryldy», - dedi TJM Azamattyq qorǵanys jáne áskerı bólimder komıtetiniń aǵa ofıtseri Erasyl Saıpash OKQ-de ótken brıfıngide. 

Mınıstrliktiń búgingi aqparaty boıynsha, elimizdiń 8 óńirinde (Aqtóbe, Qostanaı, BQO, Aqmola, Qaraǵandy, Atyraý, SQO, Ulytaý) jergilikti aýqymdaǵy 38 tótenshe jaǵdaı kúshinde. 

«Tótenshe jaǵdaılar mınıstrligi azamattardy sý tasqyny kezinde muqııat bolýǵa, qaýipsizdik sharalaryn qatań saqtaýǵa, úıleri men evakýatsııalaý pýnkterinen ruqsatsyz shyqpaýǵa jáne balalardy qaraýsyz qaldyrmaýǵa shaqyrady», - deıdi ol. 

Aıta keteıik, sý basqan óńirlerde adamdar úıine oralyp jatyr. Sondaı-aq 6950 adam, onyń ishinde 3113 bala evakýatsııalaý pýnkterinde qalyp otyr.