TJM eskertedi: Qatty aıaz tehnogendik órttiń kóbeıýine yqpal etýi múmkin
Keıbir aýdandarda qar kóp jaýyp, boran bolady dep boljanýda. Ońtústik óńirlerde jańbyr jaýyp, sońy qarǵa ulasady, tuman túsip, kóktaıǵaq bolady. Ekpini sekýndyna 15-30 metrge deıin nemese odan da kóp jel soǵýy múmkin. Jaýyn-shashyn toqtap, turaqsyz aýa raıy aıazǵa aýysady.
7-15 jeltoqsan aralyǵynda sýyq arktıkalyq aýa massasynyń kelýimen elimizdiń barlyq aýmaǵynda aýa temperatýrasy:
— Qostanaı, Aqmola, Soltústik Qazaqstan, Pavlodar oblystarynda túnde -39°S, kúndiz -35°S deıin;
— Ulytaý, Abaı, Qaraǵandy jáne Shyǵys Qazaqstan oblystarynda túnde -35°S, kúndiz -30°S deıin;
— Batys Qazaqstan, Aqtóbe oblystarynda túnde -23°S, kúndiz -20°S deıin;
— Qyzylorda oblysynda túnde -20°S deıin, kúndiz -15°S deıin;
— Túrkistan, Jambyl, Almaty jáne Jetisý oblystarynda túnde -25°S deıin, kúndiz -17°S deıin, taýly aýdandarda túnde -30°S deıin, kúndiz 15°S deıin;
— Atyraý, Mańǵystaý oblystarynda túnde -18°S, kúndiz -12°S deıin kúrt tómendeıdi.
TJM qaýipsizdik sharalaryn saqtaýǵa keńes beredi.
Daýyl týraly eskertýler jarııalaǵan kezde, ásirese qarańǵy ýaqytta alys saparǵa shyǵýdan bas tartyp, jaıaý júrmegen jón.
«Aýa raıy jaǵdaıy men avtojoldardaǵy kólik qozǵalysynyń shekteýleri týraly aqparatty baqylańyzdar.
Qatty jel bolǵan jaǵdaıda jaqyn mańdaǵy ǵımaratta nemese qaýipsiz jerde jasyryný qajet. Aǵashtardan, ilýli turǵan konstrýktsııalardan, elektr jelilerinen jáne bılbordtardan aýlaq bolyńyzdar.
Balalardy qaraýsyz qaldyrmańyzdar», — dep eskertti TJM.
Qatty aıaz tehnogendik órtterdiń kóbeıýine yqpal etýi múmkin. Osyǵan baılanysty qutqarýshylar joǵary qýatty elektr qurylǵylaryn bir ýaqytta qosý arqyly peshterdi qyzdyrmaýǵa nemese elektr jelilerin shamadan tys júktemeýge keńes beredi.
«Avtokólik ıelerine ashyq ottyń kómegimen avtomobılderdi jylytý qaýpi týraly eske salamyz.
Barlyq oqıǵalar týraly 112 nemese 101 telefondaryna habarlasýyńyzdy suraımyz», — delingen aqparatta.