TJM basshysy eki óńirdiń sý tasqyny qaýpi bar ýchaskelerine áýeden baqylaý júrgizdi

NUR-SULTAN. QazAqparat - 21-22 sáýirde QR Tótenshe jaǵdaılar mınıstri ıÝrıı Ilın Aqmola jáne Soltústik Qazaqstan oblystarynyń sý tasqyny qaýpi bar ýchaskeleri men eldi mekenderine aerovızýaldy baqylaý júrgizdi. Bul týraly QazAqparat atalmysh vedomostvonyń baspasóz qyzmetine silteme jasap habarlaıdy.

Qaýipti aımaqtardy áýeden baqylaý jumystaryna TJ vıtse-mınıstri Marat Kúldikov, Aqmola jáne Soltústik Qazaqstan oblystary TJ departamentteriniń basshylary, ákimderiniń orynbasarlary men buqaralyq aqparat quraldarynyń ókilderi qatysty.

Ushý barysynda Aqmola oblysynyń Tselınograd, Astrahan, Atbasar, Sandyqtaý, Zerendi aýdandarynyń jáne Soltústik Qazaqstan oblysynyń Aıyrtaý, Esil, Aqqaıyń, Taıynsha, Esil, Ǵ.Músirepov, Shal aqyn aýdandarynyń sý tasqyny qaýipti ýchaskeleri men eldi mekenderi tekserildi. Esil jáne Jabaı ózenderiniń arnasyn boılaı ushqan arnaıy top Aqmola jáne Soltústik Qazaqstan oblystaryndaǵy sý tasqyny qaýpi edáýir seıilgenin kórdi.

«Aqmola oblysynyń aýmaǵynda josparly ushý sý tasqyny jaǵdaıy qalypty ekenin kórsetti. Jalǵyz qaýip Kolýton ózeniniń keı bólikterinde baıqalady. Munda bir apta boıy sý deńgeıi kóterilgen. Qazir tómendeýde. Shamamen 10-14 kúnnen keıin jaǵdaı qalpyna kelýi tıis», - dedi ıÝrıı Ilın.

Óz kezeginde Aqmola oblysy ákiminiń orynbasary Ǵalymjan Ábdiqalyqov barlyq ózenderde sýdyń tómendeýi baıqalatynyn jáne sý aıdyndary óz arnalaryna kirgenin aıtty.

Sonymen qatar ıÝrıı Ilın áýeden baqylaý barysynda orman paıdalanýshylary men sharýa qojalyqtary Aqmola jáne Soltústik Qazaqstan oblysynyń keıbir aýdandarynda orman alqaby mańyndaǵy qurǵaq shópti josparly órteý jumystaryna kiriskenin eskertti.

Mınıstrdiń sózinshe, kóktemde bul jumystar kóbinese baqylaýsyz júrgiziledi jáne iri órtterdiń týyndaýyna sebep bolady. Olar bul jumystardy qar erı salysymen bastap ketedi. Alaıda qurǵaq shópti jaǵý jumystary júrgizilgen jaǵdaıda, sharýalar TJ departamentterine habarlasýy tıis. Bul fakt teris saldarǵa ákep soqtyrmas úshin aldyn ala eskertý qajet.

Kelesi baǵyt Soltústik Qazaqstan oblysynyń aýmaǵynda ótti. Ushý barysynda Esil ózeni arnasynyń tómengi jaǵynda sý deńgeıi kóterilip, sý ózen boıyn toltyratyny anyqtaldy. Qazirgi ýaqytta sý tasqyny Esil aýdanynyń Pokrovka aýylynyń mańynda ótýde. Sý deńgeıiniń kóterilýi shekti belgilerge jetken joq. Ózen arnasy taza, muz qubylystary baıqalmaıdy.

Іs-shara sońynda mınıstr Aqmola jáne Soltústik Qazaqstan oblystaryndaǵy sý tasqyny jaǵdaıyn baqylaý boıynsha birqatar tapsyrma berdi.