TJM avıatsııasynyń quramyn taǵy 10 jas qutqarýshy-ushqysh tolyqtyrdy
Bul týraly QazAqparat QR Tótenshe jaǵdaılar mınıstrligi «Qazavıaqutqarý» qyzmetiniń baspasóz qyzmetine silteme jasap habarlaıdy.
Turysbekova Bıbıhan, Jánibek Erasyl, Sábıtov Temirbolat, Bısenbekov Jaras, Qýanyshuly Nurdáýlet jáne Bazarbaev Álisher qyzmetke kirisý baǵdarlamasynan ótti. Ushqyshtar ushýǵa jiberilip, reseılik Mı-8T áýe kemeleri ekıpajdarynyń quramynda tikeleı jumystar júrgize bastady.
Sondaı-aq, 4 qutqarýshy ushqysh Eurocopter shyǵarǵan batys tikushaqtarynda arnaıy operatsııalarǵa qatysady. Olardyń qatarynda Ahmetov Rasýlbek, Nurǵalıeva Nazel, Baqtybaı Eldos jáne Túgizbaev Bısenǵalı bar.
Búgingi tańda ushqyshtar Qazaqstannyń barlyq aýmaǵynda áýe kemeleriniń ornalasý oryndary boıynsha anyqtalǵan jáne halyqqa shuǵyl medıtsınalyq kómek kórsetý jáne naýqastar men zardap shekkenderdi áýe keńistigi boıynsha jedel tasymaldaý, izdestirý-qutqarý operatsııalaryn júrgizý, órt oshaqtaryn patrýldeý, sondaı-aq TJM jeke quramyn, qurylymdyq aýmaqtyq bólimshelerdi jáne erikti qutqarý quramalaryn Tótenshe jaǵdaılar aımaqtaryna jetkizý boıynsha ushýlardy oryndaıdy.
Jas qutqarýshylar Almaty qalasyndaǵy Azamattyq avıatsııa akademııasyn úzdik bitirdi, sodan keıin Qazaqstan TJM avıatsııalyq bólimshesinde jumys isteý úshin irikteldi. Ekinshi ushqyshtyń qyzmetine qol jetkizý úshin olar «Qazavıaqutqarý» ushqyshtar quramyn daıarlaý baǵdarlamasynan ótti. Baǵdarlama aıaqtalǵannan keıin Azamattyq avıatsııa salasyndaǵy ýákiletti organ «Qazaqstannyń avıatsııalyq ákimshiligi» ekinshi ushqyshtyń derbes kásibı qyzmetine ruqsat berdi.
Tótenshe jaǵdaılar mınıstrliginiń, sondaı-aq «Qazavıaqutqarý» avıatsııalyq qutqarý bólimshesiniń basshylyǵy jas qutqarýshy-ushqyshtardy daıarlaýǵa erekshe kóńil bóledi, óıtkeni olardyń odan ári jumysy tótenshe jaǵdaılardyń aldyn alý jáne olardy joıý jónindegi ómirlik mańyzdy mindetterdi oryndaýmen baılanysty. Ushý qyzmetine jas mamandar kelýde, myqty kadrlyq rezerv qalyptasýda. Bul rette «Qazavıaqutqarý» áýekompanııasy jumysynyń basty myzǵymas negizi - ushý qaýipsizdigi men adamdardy qutqarý bolyp qala beredi.