TJM Almatydaǵy jer silkinisinen keıin qandaı shara qoldandy
«Seısmologııa ınstıtýty Almaty aımaǵynda qandaı da bir eleýli, joıqyn jer silkinisi kútilmeıtinin aıtýda. Eshkim 100% kepildik bere almaıtynyn túsindirgim keledi», - dedi TJM basshysy Úkimet úıinde ótken baspasóz máslıhatynda.
Shyńǵys Árinov TJM yqtımal jer silkinisi jaǵdaılaryna tıisti daıyndyq jumystaryn júrgize bastaǵanyn atap ótti.
«Almatynyń seısmıkalyq qaýipti aımaqta ekenin eskerip, halyq eń kóp qonystanǵan qala ekenin, kópqabatty ǵımarattar bar ekenin, máseleniń óte mańyzdy ekenin túsinemiz. Biz TJM retinde barlyq tıisti jumystardy júrgize bastadyq. Biz ony qatty jarııalamaımyz, biraq jaqyn arada Almaty turǵyndary bul jumysty kóredi», - dedi ol.
Mınıstr TJ aldyn alý departamentiniń basshysy, TJ joıý departamentiniń basshysy, sondaı-aq azamattyq qorǵanys komıtetiniń tóraǵasyn Almatyǵa issaparǵa jibergen.
«Olar TJD aýmaqtyq basshysymen, bizdiń oblystyq departamenttermen, ákimdiktermen esh qaǵazbastylyqsyz ózara is-qımyl jasap, is júzinde pysyqtaýdy bastady. Biz páter ıeleri kooperatıvterimen jáne múlik ıeleri birlestikterimen jumys istep jatyrmyz jáne qajet bolǵan jaǵdaıda ár úıdi, ár aýlany aralaımyz, turǵyndar arasynan eriktilerdi iriktep alamyz. Máselen, burynǵy qyzmetkerlerimiz, qajetti ýaqytta is-qımyldardy uıymdastyra alatyn zeınetkerlerimiz bar», - dep atap ótti TJM basshysy.
Sonymen birge, Almaty úılerindegi chattarǵa tótenshe jaǵdaı kezindegi is áreket týraly usynymdar jiberilmek.
«Ózimizdiń Telegram-kanalymyzda belsendi jumys isteı bastadyq, barlyq oqıǵalar boıynsha halyqty habardar etemiz. Onda árbir azamatqa, Almatynyń árbir turǵynyna túsinikti tilde tótenshe jaǵdaıda ne isteý kerektigi túsindiriledi. Alǵashqy atqarylǵan jumystar osyndaı jáne olar jalǵasyn tabady», - dedi Sh. Árinov.