TJ jáne jalpy jaǵdaıǵa baılanysty jumyssyz qalǵandar tólemdi qalaı alady
«Tótenshe jaǵdaıǵa baılanysty jumysynan aıyrylyp qalǵandarǵa beriletin 42 500 teńge týraly kóptegen suraqtar kelip jatyr. Karantın jaǵdaıynda jumyskerler úıde otyrady, al 42 500 teńge berý máselesin jumys berýshi sheshedi. Jumys berýshi ótinish jazyp, qolastynda jumys isteıtinderdiń tizimin beredi. Olardyń qansha ýaqyt boıy jumyssyz otyrǵandary, aty-jóni, JSN jáne taǵy da basqa qajetti aqparattar da sol jerge jazylady», - deıdi Memlekettik áleýmettik saqtandyrý qory áleýmetpen baılanys departamentiniń dırektory Gúlbaǵıla Bolatbekova onlaı ótken brıfıngte.
Onyń aıtýynsha, jumys berýshiden kelgen qujatty aldymen jergilikti jumyspen qamtý ortalyǵynyń janynan qurylǵan shtab qaraıdy.
«El arasynda biryńǵaı jıyntyq tóleıtin tulǵalar bar. Mysaly, ol úıde jumys istegen nemese jeke tulǵalarǵa qyzmet kórsetken azamat bolýy múmkin. Óz jumysyn toqtatqan taksıster, úı jınaýshylar da bar. Jıyntyq tólemdi úsh aıdan kem tólemegen bolsa – olar da qujattaryn jınap, bizden 42 500 teńge tólem alýyna bolady.
Sondaı-aq, mindetti áleýmettik júıesi engizilgennen bastap tólenetin taǵy bir tólem – jumysynan aıyrylýyna baılanysty tólenetin tólem. Bul áleýmettik tólem jumyssyz retinde tirkelgen azamattarǵa beriledi. Eger siz jumysyńyzdan qysqartylǵan boslańyz nemese óz erkińizben jumystan shyqqan bolsańyz – jumyspen qamtý ortalyǵyna jumyssyz retinde tirkelip, anyqtama alyp, bizdiń qorǵa ótinish bere otyryp jumysynan aıyrylý boıynsha áleýmettik tólem alýǵa múmkindigińiz bar. Bul áleýmettik tólemniń mólsheri – sizdiń sońǵy eki jyldaǵy ortasha aılyǵyńyzdyń 40%-y. Bul tólem bir aıdan alty aıǵa deıin taǵaıyndalady. Osy eki áleýmettik tólemdi shatastyrmaýlaryńyzdy suraımyz», - deıdi ol.