TJ rejımin buzý, ishimdik ishý, jalǵan habar taratý – Tasqyn kezinde polıtsııa kimderdi quryqtady

<p>ASTANA. KAZINFORM &ndash; Tótenshe jaǵdaı men jappaı tártipsizdik kezinde qylmys jasaý jaýapkershilikti edáýir aýyrlatady. Bul týraly QR Іshki ister mınıstrligi Ákimshilik polıtsııa komıtetiniń tóraǵasy Qaısar Sultanbaev aıtyp berdi.&nbsp;</p>

«Jalǵan aqparattyń taralýyna jol bermeý úshin Іshki ister organdary aqparattyq keńistikke monıtorıng júrgizýde. Mysaly, Jańaózen qalasynyń turǵyny sý tasqyny saldarynan qalada jol jabyldy dep jalǵan aqparat taratyp, jaýapqa tartyldy. Sondaı-aq, Qaratomar sý qoımasyndaǵy jaryqshaq týraly jalǵan aqparat taratqany úshin Qostanaı turǵynyna qatysty taǵy bir ákimshilik materıal jınaldy. Sotqa jiberýdi josparlap otyrmyz. Osy oraıda, jalǵan aqparat taratýshylar jaýapkershilikke tartylatynyn eskertemiz», - dedi Q. Sultanbaev Ortalyq kommýnıkatsııalar qyzmetinde ótken baspasóz máslıhatynda.

Al Qostanaıda sý basqan aımaqqa kirýge tyıym salý týraly polıtsııa qyzmetkerleriniń zańdy talaptaryna baǵynbaǵany úshin 4 adam jaýapqa tartylǵan.

6 sáýirde túngi ýaqytta Qostanaıda tereńdigi bir metrge deıin jetetin sý basqan aımaqqa ótpek bolǵan mas adamdar toqtatyldy. 

Ustaý kezinde olar polıtsııa qyzmetkerlerine qarsylyq kórsetip, talaptaryna baǵynbaǵan.

Oǵan qosa, qoǵamdyq orynda mas bolyp júrgeni jáne tótenshe jaǵdaı rejımin buzǵany úshin jaýapqa tartylǵan.

«Elimizdiń zańnamasyna sáıkes tótenshe jaǵdaı men jappaı tártipsizdik kezinde qylmystyq quqyq buzýshylyq jasaý jaýaptylyq pen jazany aýyrlatatyn mán-jaılar dep tanylady. Mysaly, kisi óltirý, densaýlyqqa qasaqana aýyr zııan keltirý, zorlaý, jynystyq sıpattaǵy zorlyq-zombylyq áreketteri úshin jaza kúsheıtildi. Osy kezde ádeıi jalǵan aqparat taratý, bılik ókiline baǵynbaý, oǵan qatysty qorqytý nemese zorlyq-zombylyq jasaý jaýapkershilikti aýyrlatady», - dep túsindirdi spıker.

Sonymen qatar, zańǵa sáıkes tótenshe jaǵdaı kezinde laýazymdy tulǵalardyń da jaýapkershiligi artady.

Qyzmet barysyndaǵy áreketsizdik, quqyq qorǵaý organy qyzmetkeriniń óz mindetterin oryndaýdan jaltarýy qylmystyq jaýapty aýyrlatady.

Qaýipsizdikti qamtamasyz etý boıynsha qyzmet atqarý qaǵıdalaryn buzǵan, azamattarǵa, ǵımarattarǵa shabýyl jasaý men múlikti qaýipti tásilmen joıýǵa qarsy sharalar qabyldamaǵan bastyqtyń áreketsizdigi úshin jaýapkershilik kúsheıedi.