Tynyshtyqbek Ábdikákimuly: Abaı jýyq mańda zerttelip bola qoımaıtyn kúrdeli tulǵa

NUR-SULTAN. QazAqparat - Abaıdy álemge tanytýdan buryn onyń qandaı deńgeıdegi tulǵa ekenin ózimiz tanyp alýymyz kerek. Mundaı pikirdi Abaıdyń 175 jyldyq mereıtoıynyń resmı ashylýyna arnalǵan sharadan keıin aqyn Tynyshtyqbek Ábdikákimuly bildirdi, dep habarlaıdy QazAqparat tilshisi.

«Qazirgi ýaqytta abaıtanýshylar Abaıdy hákim deıdi. Menińshe, Abaı hákimdikten de joǵary turǵan adam. Osyny zertteýmiz qajet. Máselen, Abaıdy únemi Batys pen Shyǵys órkenıetine baılanystyra qaraı kele «solardan úırengen, zerttegen, óz halqyna danalyqty sol órkenıetter qazynasy arqyly túıindeı jasaǵan» deıdi. Menińshe, qazaq halqy da aspannan túsken joq. Onyń arǵy ata-babalarynyń myńdaǵan jyldardan buryn kele jatqan órkenıeti, dúnıetanymy bolǵan. Mine, Abaıdy osy turǵyda zertteý jetispeı jatyr», - dedi aqyn.

Onyń aıtýynsha, Abaı óziniń arǵy-bergi ata-babalarynyń dúnıetanymynan ne aldy, ony eńbekterine qalaı jaratty, urpaqqa qalaı mıras etti, ne aıtqysy keldi degen máselelerdi saralaý qajet.

«Osy turǵydan kelgende Abaıdy álemge tanytýdan buryn biz onyń qandaı deńgeıdegi adam ekenin tanyp alýymyz kerek. Árıne, Abaı danyshpan, aqyn dep aıtýǵa ońaı. Abaı óte keń, jýyq mańda zerttelip bola qoımaıtyn kúrdeli tulǵa. Sondyqtan bıyldy abaıtaný jańa zamanynyń bastapqy kezeńi dep esepteýimiz kerek», - dedi Tynyshtyqbek Ábdikákimuly.