«Tynyshtyq jaqpaı ma?» - BAQ-qa sholý

ASTANA. 4 maýsym. QazAqparat - «QazAqparat» agenttigi respýblıkalyq basylymdarda 4 maýsym, seısenbi kúni shyqqan ózekti materıaldarǵa sholýdy usynady.

***

Keshe Qazaqstan Res­pýb­lıkasynyń Prezıdenti Nursultan Nazarbaev elimizge resmı saparmen kelgen Lat­vııa Respýblıkasynyń Pre­zıdenti Andrıs Berzınshpen kezdesti. Kezdesý barysynda Qazaqstan-Latvııa qa­rym-qatynastaryn sapaly jańa deńgeıge kóterýge ba­ǵyt­talǵan ózara is-qımyl­dyń negizgi baǵyttary qaras­ty­ryldy. Taraptar saýda-eko­no­mıkalyq jáne kólik-tranzıttik yntymaqtastyq aıa­syn keńeıtý joldaryn da tal­­qylady. Osy jaıt arqaý bolǵan maqala «Egemen Qazaqstan» gazetiniń búgingi sanynda «Qazaqstan - Latvııa: Yntymaqtastyqtaǵy jańa qadam» degen taqyryppen berildi. Basylymnyń atap ótýinshe, kezdesýden keıingi birlesken baspasóz málimdemesi barysynda Qazaqstan Prezıdenti elderi­mizdi saıası jáne ekonomıkalyq baılanystar ǵana emes, sondaı-aq tarıhymyzdyń ortaqtyǵy baılanystyratynyn atap ótti. «Qazaq jáne latysh halyqtary ár­daıym bir-birin qurmettep, qoldaý kórsetip keledi. Latvııa Prezıdentiniń sapary kezindegi negizgi bir shara - Qaraǵandy ob­ly­synyń Spassk eldi mekeninde saıa­sı qýǵyn-súrgin qurbany bolǵan latyshtarǵa arnalǵan eskertkish ashý. Bul - taǵdyrdyń jazýymen qazaq dalasyna kelgen otandastar rýhyna degen shynaıy qurmettiń belgisi», - dedi Elbasy.

«Qazaqstannyń quqyq qorǵaý organdary qazir Muhtar Ábilázovtiń BTA bank qarjylaryn urlaý, uıymdasqan qylmystyq top quryp, oǵan basshylyq jasaý, qylmystyq jolmen alynǵan tabystardy jasyryp, ony syrtqa asyryp jiberý jáne bank qarajatyn zańsyz paıdalaný faktileri boıyn­sha qylmystyq isterdi tergeýdi jal­ǵastyryp jatyr»,- dep jazady «Egemen Qazaqstan» gazeti búgingi sanyndaǵy «Áshkere bolǵan is» degen taqyryptaǵy maqalasynda. Basylymnyń atap ótýinshe, ıtalııalyq quqyq qorǵaý organdary Ábilá­zovti anyqtaý men ustaý boıynsha sharalardy jalǵastyrýda. Burynyraqta qazaqstandyq quqyq qor­­­­ǵaý organdary Ábilázovtiń tý­ystaryna, sonyń ishinde Shalabaeva men onyń qyzyna is júzinde olar Qa­zaqstan Respýblıkasynda joq bolǵan kez­de ulttyq pasportty zańsyz jasaý men berý faktilerin anyqtaǵan bolatyn.

***

«Aıqyn» gazetiniń jazýynsha, aıyrqalpaqty qyrǵyz taǵy shala búlindi. Shı «Qumtór» degen altyn kenishinen shyqty. Kenishtiń 100 paıyzdyq aktsııasy kanadalyq Centerra Gold kompanııasyna tıesili. Al ony jergilikti turǵyndar memleket menshigine alýdy talap etti. Sondaı-aq kompanııa joldardy jóndep, mektep, balabaqshalar salýdy, turmysy tómen jandardy janar-jaǵarmaımen qamtamasyz etýdi, 8-10 jylǵa 5 paıyzdyq nesıeler berýdi surady. «Ókinishtisi, jergilikti eldiń ta­labyn elep-eskergen eshkim bol­ma­dy. Qaqtyǵys sodan týdy. Bıliktiń tirligine yrza bolmaǵan jurt Ys­tyqkól jaǵasynda ornalasqan elektr stansasyn basyp alyp, ja­ryqty sóndirdi. «Qumtór» altyn kenishi, sol mańdaǵy 50 myńǵa jýyq qaýym, qytaı-qyrǵyz shekarasyn­daǵy birneshe zastava jaryqsyz qaldy. Ystyqkólde bastalǵan daý sol jermen shektelip qalmady. Olardy ońtústiktegi oppozıtsııa ókil­deri qoldap shyqty. Jalal-Abad oblystyq ákimshilik ǵıma­ratyn basyp aldy. Tipti Jalal-Abad oblysyndaǵy «Ata Jurt» par­tııasynyń úılestirýshisi Medet Úsenovti «halyq gýbernatory» dep saılap ta jiberdi. Osylaısha qyr­ǵyz eliniń ońtústigi bir tolqyp qal­ǵan»,- dep jazady basylym. Maqala «Tynyshtyq jaqpaı ma?» degen taqyryppen berilgen.

«Eýropalyq odaq aqyry Qazaqstannyń «Dúnıejúzilik saýda uıymyna» múshe bolýyna «aq batasyn» beripti! Aqjoltaı habar Aqordada jarııa etildi. Bul kúni óziniń aq saraıynda Elbasy Nursultan Nazarbaev Eýroodaqtyń tizginin ustaǵan bıik mártebeli meımanmen joǵary deńgeıdegi kelissózder júrgizdi. Eýropalyq komıssııa tóraǵasy Joze Manýel Barrozý Qazaq eline tuńǵysh ret resmı saparmen kelip otyr», -dep jazady «Aıqyn» gazeti. «Men búgin, osy jerde, Qazaqstanyń DSU-ǵa kirýiniń ekijaqty sharttarynyń eleýli bólikteri boıynsha bizdiń kelis­sózshilerimizdiń aqyr sońynda kelisimge kelgendigin qýana-qýana rastaımyn! Endi biz osy Kelisimge jaqyn ýaqytta qol qo­ıy­lýyn asyǵa kútetin bolamyz», -dedi Joze Manýel Barrozý Elbasymen kezdesýden keıingi birlesken málimdemesinde.

***

Ońtústik Qazaqstan oblysynda polıtsııa polkovnıgi 30 myń teńge para alǵany úshin 3 jylǵa bas bostandyǵynan aıyrylady. Bul jaıynda «Ekspress-K» gazetinde «Polkovnıký nıkto ne spıshet» degen taqyryptaǵy maqalada keńinen baıandalǵan. Basylymnyń atap ótýinshe, aǵymdaǵy jyldyń qańtarynda Saryaǵash aýdanynyń 34 jastaǵy turǵyny aryzdanǵan. Ol óz aryzynda Saryaǵash aýdandyq ishki ister bólimi bastyǵynyń orynbasary Ózbekstannan jumysshylar jaldaýǵa kedergi keltirmeý úshin para talap etkendigin atap kórsetken. 27 aqpanda oblystyq ІІD ózindik qaýipsizdik basqarmasynyń jedel qyzmetkerleri OQO qarjy polıtsııasy qyzmetkerlerimen birlesip polkovnıkti para alyp jatqan jerinen qolǵa túsirgen.