Tynysbek Bópishbaı: Abaıdyń portretin quraý úshin 600 Rýbık kýbıgi men 5 saǵat qajet boldy
- Tynysbek, aldymen óziń týraly toqtalyp ótseń. Qaı óńirde dúnıege keldiń? Qazirgi ýaqytta qaı mamandyq boıynsha oqyp jatyrsyń?
- Men Túrkistan oblysynda dúnıege kelgenmin. 21 jastamyn. Qazirgi ýaqytta L.N.Gýmılev atyndaǵy Eýrazııa ulttyq ýnıversıtetiniń 4-kýrs stýdentimin. Mamandyǵym - «Kólik, kóliktik tehnıkalar jáne tehnologııalar».
- Rýbık kýbıgin jınaýǵa degen qyzyǵýshylyǵyńyz qashan oıandy?
- Rýbık kýbıgin jınaýmen hobbı retinde aınalysamyn. Shamamen 7-8 synyp oqıtyn kezden bastap jınaýdy tolyq meńgerip aldym. Bastapqyda kýbıkterden gúl, janýarlardyń beınesin jasaıtynmyn. Ýaqyt óte kele Rýbık kýbıginiń sany 600-ge jetti. Odan keıin osy kýbıkterden qyzymnyń portretin jasadym. Ol portret áleýmettik jelide talqylanyp, jaqsy pikirler aıtyldy. Eń baǵaly syılyq - óz qolyńmen jasaǵan syılyq. Qyzym qatty qýandy. Ol Rýbık kýbıgin qurastyra alatynymdy biledi, biraq odan portret qurastyra alatynymdy bilmeıtin. Odan keıin Jaqsylyq Úshkempirovtiń, Abaı atamyzdyń beınesin qurastyrdym.
- Rýbık kýbıgin jınaýdy qalaı úırendińiz? Ony jınaýdyń ádis-tásilderin qaıdan úırendińiz?
- Oqýshy kezimde mekteptegi balalardyń bári Rýbık kýbıgin ustap júretin. Sol balalarmen birge úırenip kettim. You Tube jelisinde de qalaı quraý kerek ekenin úıretedi, biraq ony 20-30 mınýt qarap otyrýǵa shydamym jetpeıtin.
- Qyzyńyzdyń portretin qurastyrǵan kezde qansha Rýbık kýbıgin qoldandyńyz? Týyndyńyzdy qansha ýaqytta aıaqtadyńyz?
- 600 Rýbık kýbıgi ketti. 1 mınýttyq vıdeorolık bolǵanymen, onyń artynda 5 saǵattyq jumys bar.
- Adamnyń beınesin qurastyrar kezde qalaı daıyndalasyz?
- Mysaly, Rýbık kýbıginde qara tús joq, sol sebepti shashtyń túsi jasyl bolatynyn aldyn ala kóz aldyma elestetip alamyn. Bet-álpeti men qúlaǵy qyzyl tústi bolady degen sııaqty qandaı tús tańdaıtynymdy da aldyn ala oılastyramyn. Rýbık kýbıginen adam beınesin qurastyrǵan kezde vıdeoǵa túsirip, áleýmettik jelige salatyn bolǵandyqtan, aınalamdaǵy kóriniske úlken mán beremin. Kóbinese ashyq aspan astynda, sý jaǵasynda otyryp jumys istegendi jaqsy kóremin.
- Jaqsylyq Úshkempirov pen Abaı atamyzdyń beınesin jasaýǵa qansha ýaqyt jáne qansha Rýbık kýbıgi ketti?
- Jaqsylyq Úshkempirov - dańqty sportshy. Oǵan degen qurmetim zor. Onyń da portretin jasaý úshin 600 Rýbık kýbıgi ketti. Kýbık sany neǵurlym kóp bolǵan saıyn portret sátti shyǵady.
- Abaıdyń portretin tanystyrýyńyz «Báıterek» monýmentiniń mańynda saltanatty túrde ótti. Bul sharany kim uıymdastyrdy?
- Jaqsylyq Úshkempirov atamyzdyń portretin jasaǵan vıdeony kórgen tilshiler maǵan habarlasyp, Abaı atamyzdyń da beınesin salýdy ótindi. Men qýana kelistim. Osylaısha Rýbık kýbıginen Abaı atamyzdyń portretin quradym, tilshiler vıdeoǵa túsirdi. Portrettiń uzyndyǵy - 1 metr 60 sm, eni - 1 metr boldy. Rýbık kýbıgi 6 tústi bolsa, men sonyń 5 túsin qoldandym.
- Joǵaryda bul sizdiń hobbıińiz ekenin aıtyp óttińiz. Bolashaqta kásip retinde qolǵa alý josparda bar ma?
- Qazirgi ýaqytta kóp adam aqyly túrde portret qurap berýimdi ótinip jaza bastady. Bul qabiletimdi kásip kózine aınaldyrý týraly oılanyp kórýge bolady. Tapsyrys bergen adamnyń ótinishi boıynsha portretti qurap, vıdeoǵa túsirip jiberem, al Rýbık kýbıgi ózimde qalady. Al Rýbık kýbıgin tapsyrys berýshi ózi alyp kelse - onda, árıne, portretti ózimen alyp ketýine bolady.
- Suhbatyńyz úshin rahmet!
Vıdeo: Elorda aqparat