«Tynys al, bóbek!» jobasy eki myń náresteniń ómirin arashalap qaldy

ALMATY. QazAqparat- «Tynys al, bóbek!» jobasy aıaqtaldy. Osy shara barysynda bizdiń qor, elimizdegi oblystyq perınataldyq ortalyqtardyń jansaqtaý bólimderin 337,5 mln. teńgege qazirgi zamanǵy medıtsınalyq quraldarmen jabdyqtady». Bul týraly búgin Almaty qalasynda ótken baspasóz máslıhatynda «Aıala» qaıyrymdylyq qorynyń prezıdenti Aıdan Súleımenova aıtty.

Onyń aıtýynsha, 2008 jyly Qazaqstan Dúnıejúzilik densaýlyq saqtaý uıymynyń standarttaryna kóshken bolatyn. Jańa talap boıynsha, salmaǵy 500 gramnan joǵary týǵan náresteler tiri týǵan bolyp sanaldy. Buǵan deıingi standart - 1200 gramm edi. Jańa standart - sábıler arasyndaǵy ólim-jitimniń deńgeıin kúrt arttyryp jiberdi. Óıtkeni dárigerler buǵan daıyn emes edi. Sondyqtan olardyń biliktiligin arttyryp, balalarǵa arnalǵan jansaqtaý bólimderin joǵary tehnologııalyq quraldarmen jabdyqtaý qajet boldy.

«Tynys al, bóbek!» jobasy Almatyda 2009 jyly qolǵa alyndy. Joba aıasynda ásirese Almaty qalalyq perınataldyq ortalyqqa kóp kóńil bólindi. Atalmysh ortalyq, qordyń bergen apparatýralarynyń arqasynda salmaǵy 1000 gramǵa jetpeı shala týǵan nárestelerdiń ómirsheńdigin 5 paıyzdan 25 paıyzǵa, ıaǵnı bes esege jýyq arttyrdy.

20011 jyly «Aıala» qory men QR Densaýlyq saqtaý mınıstrligi arasynda ózara yntymaqtastyq jóninde memorandýmǵa qol qoıyldy. Sóıtip, joba respýblıkalyq mártebege ıe boldy. Qor demeýshiler tartyp, qajetti qondyrǵylardy ala bastady.

Osylaısha, 2009 jyldan 2014 jylǵa deıin Qazaqstannyń 17 qalasynyń perınataldyq ortalyqtary qazirgi zamanǵy apparatýralarmen qamtamasyz etildi. Olarda qutqarylǵan nárestelerdiń sany artty. Bul, 2013 jyly elimiz boıynsha jańa týǵan náresteler arasynda ólim-jitimniń kórsetkishin 17 paıyzǵa tómendetýge múmkindik berdi.

Sondaı nárestelerdiń biri, Aqtaýlyq Nurıslam J. Ol óte aýyr halde týǵan bolatyn. Ózdiginen dem ala almaıtyn, eme almaıtyn. Dárigerler men jańa tehnologııanyń arqasynda aman qaldy. Qazir oıdaǵydaı ósip keledi. Mundaı balalardyń sany elimizde eki myńǵa jetti.

«Eger biz bala bosandyrýshylarǵa, neonatologtarǵa, orta jáne kishi medıtsınalyq dárigerler quramyna qol ushymyzdy bere alsaq, onda maqsatymyzdyń oryndalǵandyǵy. Demeýshilersiz bul jobany júzege asyrý múmkin bolmas edi. Barlyǵynyń atyn ataǵyń keledi. Biraq buǵan kóp ýaqyt ketedi. Jobany densaýlyq saqtaý mınıstrligi men oblystyq densaýlyq saqtaý departamentteri qoldady», - dedi óz sózinde A. Súleımenova.