Tyń jobalar qolǵa alynbaq
Bul joba Qazaqstan Respýblıkasy Prezıdenti N.Á.Nazarbaev tóraǵasy bolyp tabylatyn Dúnıejúzi qazaqtary qaýymdastyǵynyń 25 jyldyǵyna arnalyp otyr. Maqsat - Elbasynyń «Bolashaqqa baǵdar: rýhanı jańǵyrý» maqalasynyń aıasynda ulttyq sanamyzdy jańǵyrtý jáne tól tarıhymyzǵa serpilis ákelý.
«Álem boıynsha dúnıejúzine tarap ketken qandastaryn jınaǵan sanaýly ǵana el bar. Sonyń biri - Qazaqstan. Táýelsizdiktiń 26 jylynda halqymyzdyń qataryna 1 mıllıonǵa jýyq qandasymyz kelip qosyldy. Kósh áli toqtaǵan joq. Aldaǵy ýaqytta da jalǵasa beretin bolady», - dedi ol.
Osy oraıda Elbasynyń tapsyrmasymen Aqparat jáne kommýnıkatsııalar mınıstrligi «Qıyrdaǵy qazaqtar» jobasyn qolǵa alyp otyr. Jobany júzege asyrýda ótken jyly qurylǵan National Digital History portaly kómek kórsetetin bolady. Segiz memlekettiń aýmaǵynda jobaǵa saı sheteldegi qandastarymyz týraly derekti fılmder túsiriledi. Qandastarymyzdyń tarıhy, turmysy, erekshe dástúrleri, mádenıeti qamtylady.
Sonymen, tamyz aıynan bastap túsirý toby Reseıdiń Astrahan, Omby, Orynbor, Qorǵan, Túrikmenstannyń Túrikmenbashy, Tashaýyz, ¬Ashhabad, Chardjoý, Ózbekstannyń Bostandyq aýdany, Tashkent, Shyrshyq, Ǵazalkent, Tájikstannyń Dýshanbe, Soǵdy, Taýly Badahshan, Hatlon, Qytaıdyń Úrimshi, Qumyl, Qaramaı, Barkól, Sháýshek, Qulja, Morı, Mońǵolııanyń Qobda, Ýlan-Bator, Baıanólgeı, Irannyń Gorgan, Bender-Túrkimen, Tegeran, Meshhed, Aýǵanstannyń Kabýl, Qundyz sııaqty óńirleri men eldi mekenderinde derekti fılmdi túsire bastaıdy.
«Qazaqstan tarıhy» ınternet jobasynyń jetekshisi Oljas Berkinbaev pen «Qazkontent» AQ Basqarma tóraǵasy Evgenıı Kochetov QR SІM kómegimen, atalǵan elderdegi elshiliktermen birlese jumys júrgiziletinin aıtty.
Jýrnalıster qaýymyn shettegi qazaqtar ortasynan shyqqan kórnekti tulǵalardy qamtý, arhıv ¬materıaldaryn paıdalaný, náýbet kezeńderdegi údere kóshken el taǵdyry sııaqty kóptegen máseleler qyzyqtyryp, osy tóńirekte birqatar suraqtar qoıyldy. Jańa joba shetel qazaqtarynyń ómirin shynaıy kórsetýge múmkindik beredi.
Brıfıngten soń, belgili rejısser Oralbek Sarbasovtyń pikirin suraǵan edik: «Óte tamasha oılastyrylǵan joba. Júzege asyp jatsa tarıhymyzdy tolyqtyra túsetin úlken is bolǵaly tur. Tek, menińshe, 8 elge 8 túsirý tobyn jibergen durys sııaqty. Sebebi, belgili bir elge barý, ornalasý, adamdardy izdep tabý, sol jerdiń tabıǵatyn, eldiń salt-dástúrin, mádenıetin túsirý, materıaldardy suryptaý, qorytý ońaı ¬sharýa emes. Keminde eki aı ýaqyt ketedi. Negizi derekti fılmniń janryna sáıkes jumys isteý kerek. Bir túsirý toby úlgere almaıdy. Erteń kún sýytyp ketedi, tamasha joba jaı ǵana jýrnalıstik zertteý sııaqty, telehabar sheńberinde qalyp qoıýy múmkin» dedi ol. Iá, mamannyń pikiri qaperge alatyn-aq pikir. Jobany uıymdastyrýshylar bolashaqta muny nazarǵa alyp jatsa quba qup.
Elimizdiń Aqparat jáne kommýnıkatsııalar mınıstrligi Galam TV ınternet-televızııasyn jandandyrýdy qolǵa almaq. Bul týraly mınıstr Dáýren Abaev «Facebook» paraqshasynda málim etti.
«Internet-televızııanyń TV-ındýstrııa evolıýtsııasyndaǵy jańa sapalyq saty ekenin eshkim joqqa shyǵarmaıtyn bolar. Onyń aýdıtorııasyn keńeıtý múmkindikteri orasan zor. Bul ǵalamdyq úrdis, endeshe biz de osy baǵytty ustanýymyz qajet» dedi ol.
Mınıstr bul saladaǵy negizgi istiń biri Galam TV ınternet-televızııasyn damytýǵa baılanysty bolatynyn atap kórsetti. Ol atalǵan qyzmettiń 2014 jyly iske qosylyp, alaıda túrli sebepterge baılanysty suranystyń tómen bolǵanyn eske saldy. Olardyń qatarynda Galam TV-nyń Chrome, Opera, Internet Explorer, Yandex sııaqty braýzerlerde jumys istemeýi, mobıldi qosymshalarynyń jetilmeýi sııaqty máseleler bar.
«Kelesi kezeńderde «tapsyrys boıynsha vıdeo», til jolaqtaryn qoldaý, kirikken habarlamalar, telearnalar paketin derbes túzý, reıtıng júıesi, jeke kabınet, paıdalanýshy paketin jarııalaý múmkindigi jáne basqa da kóptegen qyzmetterdi engizý josparlanyp otyr. Galam TV Qazaqstan ınternet-televızııasy damýyndaǵy iri jańalyq bolatynyna senimdimin» dedi Dáýren Abaev. Ol Galam TV-nyń tolyqtaı tegin ekenin jáne oǵan Qazaqstannyń 24 telearnasy kiretinin de tilge tıek etti. Sonymen qatar sheteldik 100 telearna naryqtaǵy ortasha baǵadan tómen baǵamen usynylmaq. Bul másele jyl sońyna deıin sheshilmek.