Tyl ardageri vıdeorolık baıqaýynda úzdik boldy

ALMATY. QazAqparat – Eńbek jáne tyl ardageri Nadejda Nepomılýeva men QR eńbek sińirgen qaıratkeri Asyly Osman úzdik beınerolık baıqaýynda jeńiske jetti.

Almatyda «Ardagerlerdi ardaqtaıyq» onlaın aktsııasynyń jeńimpazdaryna qurmet kórsetildi.

Aǵa býyn ókilderin «Nur Otan» partııasy Almaty qalalyq fılıaly tóraǵasynyń birinshi orynbasary Meıirjan Otynshıev, QR Parlamenti Májilisiniń depýtaty Elnur Beısenbaev jáne partııanyń qalalyq fılıaly tóraǵasynyń orynbasary Qaırat Bısembaev quttyqtady.

Rolıkte olardyń ómiri men eńbek joly, sondaı-aq Táýelsizdik jyldaryndaǵy elimizdiń jetistikterine degen ózindik kózqarasy baıandalady. Olar Elbasynyń memlekettiń qalyptasýyna ólsheýsiz úles qosqanyn atap ótti. Jastarǵa óz tilekterin bildirdi.

Atalǵan beınerolıkter áleýmettik jeli qoldanýshylarynda keńinen tanyldy.

Mysaly, Nadejda Nepomılýeva - Eńbek jáne tyl ardageri, eńbek jolyn UOS jyldary poshtashy bolyp bastaǵan. Zeınetker qazirgi ýaqytta qalanyń qoǵamdyq jumysyna belsendi qatysady, kóp jyldar boıy Áýezov aýdandyq Ardagerler keńesiniń janyndaǵy patrıottyq jáne adamgershilik tárbıe jónindegi komıssııanyń tóraıymy bolyp jumys istedi. Ol - QazKSR eńbek sińirgen muǵalimi, óleń jazady. Búgingi tańda ardagerdiń 5 óleń jınaǵy jaryq kórdi.

«Qazynaly qarttarymyzǵa degen qamqorlyq kúndelikti kórinis tabýy kerek. Biz olarǵa qamqorlyq pen kóńil bólýdiń mańyzdylyǵyn túsinemiz. Aǵa býyn ókilderin qoldaý partııa músheleriniń basty maqsaty bolyp qala beredi»,-deıdi partııanyń Almaty qalalyq fılıaly tóraǵasynyń birinshi orynbasary Meıirjan Otynshıev.

Málim etilgendeı, «Nur Otan» partııasy aktsııanyń barlyq jeńimpazyna aqshalaı syılyqty kartalaryna aýdarady. El boıynsha barlyǵy 30 jeńimpaz anyqtaldy, olardyń tórteýi Almaty qalasynyń turǵyny.

Esterińizge salsaq, qazan aıynyń basynda QR Táýelsizdiginiń 30 jyldyǵyna arnalǵan jáne «Ardagerlerdi ardaqtaıyq» partııalyq jobasy aıasynda «Ardagerlerdi ardaqtaıyq» respýblıkalyq aktsııasy bastaý aldy.