Twitter-ge básekeles bolatyn jańa áleýmettik jelige 30 mln adam tirkelip úlgerdi

ASTANA. QazAqparat - Meta kompanııasy Twitter-ge tikeleı básekeles bolatyn Thread atty jańa servısti iske qosty. Alǵashqy jeti saǵatta platformaǵa 10 mln-ǵa jýyq adam tirkelgen, dep habarlaıdy QazAqparat BBC agenttigine silteme jasap.

Fýnktsıonaldylyǵy jaǵynan Threads Twitter-ge uqsas jáne Meta basshysy Mark Tsýkerberg aıtqandaı, ol onyń básekelesine aınalady.

«Buǵan biraz ýaqyt kerek, árıne. Biraq meniń oıymsha, bizdiń qosymshamyzdy 1 mlrd-tan astam adam qoldanatyn bolady. Twitter-de mundaı múmkindik boldy, biraq ony isteı almady. Tabysqa jetemiz dep úmittenemin», - dedi Tsýkerberg.

Onyń aıtýynsha, Threads tabysynyń kilti - platformadaǵy dostyq atmosfera.

«Jalǵan Instagram-da jalǵan baqytqa máz bolǵansha Twitter-de beıtanys adamdardyń shabýylyna ushyraǵan áldeqaıda jaqsy», - dep jaýap berdi Ilon Mask.

Mamandar Masktyń áleýmettik jelini satyp alǵannan keıin engizgen ózgeristerine kóńili tolmaǵan kóp qoldanýshylar jańa platformaǵa aýysady dep boljap otyr.

Threads qalaı jumys isteıdi?

Threads qysqa mátin habarlama almasýǵa arnalǵan, Twitter-degi sııaqty unatý, pikir jazý nemese repost jasaýǵa bolady.

Jazbalar 500 tańbamen shektelgen.

Threads qoldanbasyn 100-den astam elde júktep alýǵa bolady, biraq tsıfrlyq naryqty retteıtin zańnamaǵa baılanysty Eýropada áli iske qosylǵan joq.

Instagram-y bar paıdalanýshylar jańa platformaǵa óz akkaýntymen kire alady.

Arnaıy parametrler birden eki platformada mazmundy kóshirýge múmkindik beredi.

Bul múmkindik bes mınýtqa deıingi jazbalardy, siltemeler, fotosýretter men vıdeolardy qamtıdy.

Sondaı-aq, Instagram-da siz buǵattalǵan kez kelgen akkaýnt Threads-te avtomatty túrde bloktalady.

6 shildede resmı iske qosylǵan Meta kompanııasynyń Threads qosymshasy Reseı, AQSh jáne Ulybrıtanııada App Store dúkeninde kósh bastady.

Mark Tsýkerberg qazirdiń ózinde platformaǵa 30 mln astam adam tirkelgenin aıtty.