TWESCO Mońǵolııaǵa arheologııalyq ekspedıtsııa uıymdastyrady

ASTANA. QazAqparat - Túrki akademııasy halyqaralyq uıymynyń (TWESCO) basshysy Darhan Qydyráli Mońǵolııa Ulttyq Ǵylym akademııasy janyndaǵy Tarıh, arheologııa ınstıtýtynyń dırektory Chýlýýn Sampıldondov myrzamen kezdesti, dep habarlaıdy akademııanyń baspasóz qyzmeti.

Kezdesýde taraptar «Uly dala» forýmy aıasynda qol qoıylǵan yntymaqtastyq memorandýmy sheńberinde Mońǵolııa dalasyndaǵy kóne túrki keshenderin júıeli zertteý, birlesken sharalar ótkizý jáne Shıveet ýlaan kóne túrki ǵuryptyq keshenine arheologııalyq ekspedıtsııa uıymdastyrý máselelerin talqylady.

Professor Ch. Sampıldondov TWESCO-nyń ǵylymı áleýetine zor baǵa berip, halyqaralyq uıymnyń kóshpendiler órkenıetin zertteýge serpin beretinine senim bildirdi. Qos uıym basshylary 2016 jyldyń tamyz aıynda Shıveet ýlaan keshenine halyqaralyq ekspedıtsııa jasaqtap, Túrki álemi arheologtarynyń basyn qosatyn jıyn ótkizýge ýádelesti.