TV-Supren jetekshisi: Beıbitshilikti saqtaý úshin bilim kýltyna basymdyq berý kerek

ASTANA. QazAqparat - Brazılııadaǵy «UniaoPlanetaria» kommertsııalyq emes uıymynyń prezıdenti, «TV-Supren» telearnasynyń jetekshisi Ýlıssıs Rıdel de Resende Qazaqstan Prezıdenti Nursultan Nazarbaevtyń saıasaty týraly oı-paıymymen bólisti, dep habarlaıdy QazAqparat tilshisi.

«Qazaqstan Prezıdenti Nursultan Nazarbaev búkil álemde beıbitshiliktiń ornaýy úshin belsendi ári oıly túrde jumys júrgizip jatyr. Prezıdenttiń sarabdal saıasaty, onyń beıbitshiliktiń ornaýyna kúsh salýy kóptegen elderge úlgi bola alady. Kóptegen elder beıbitshilik týraly kóp aıtqanymen, naqty is-sharalardy júzege asyryp jatqan joq. Al Qazaqstan óz Prezıdentiniń arqasynda táýelsizdik alǵaly beri soǵyssyz álemniń qurylýyna kúsh salyp keledi», - deıdi ol Álemdik jáne dástúrli dinder kóshbasshylarynyń VI seziniń paneldik otyrysynda.

Ýlıssıs Rıdel de Resende óz sózinde Qazaqstanda júzden asa ult tatý-tátti ómir súrip jatqanyn, oǵan oıly saıasat pen beıbitshilikti tý etken bastamalar sep bolyp otyrǵanyn atap ótti.

«Qazaqstan Prezıdenti óz elimen birge, onyń aıasynan tys máselelerdi qozǵap otyrǵan biregeı tulǵa. Búgingi máselege ún qosar bolsam: meniń oıymsha, rýhanı jáne moraldyq daǵdarysty eńserý úshin josparly jumys pen pedagogıka kerek. Kóptegen máselelerdiń túp-tamyry - qoǵamnyń keıbir qundylyq ataýlylardy únsiz qabyldaýynda jatyr. Osyǵan baılanysty qalyptasyp qalǵan paradıgmany ózgertý baǵytynda pedagogıkany damytýdyń mańyzy zor. Ideıalar álemdi bıleıdi. Onyń kúsh-qýaty qylyshtan da qaıratty. Beıbit álemdi qurý úshin bilim kýltyna basymdyq berý kerek», - dedi ol.

Eske sala ketsek, Álemdik jáne dástúrli dinder kóshbasshylarynyń VI sezi Astanada keshe bastalǵan bolatyn. Alqaly jıynǵa barlyq álemdik jáne dástúrli dinderdiń ókilderi, sonymen qatar bedeldi dinı lıderler, saıası qaıratkerler men halyqaralyq uıym ókilderinen quralǵan 46 elden 82 delegatsııa qatysýda.