Túzeý mekemesiniń qorshaýynan uıaly telefondy laqtyryp ótkizbek bolǵan aqtóbelikter ustaldy

<p>AQTÓBE. KAZINFORM &ndash; Aqtóbede Ulttyq ulan sarbazdary túzetý mekemesiniń qorshaýyn jaǵalap, áldebir zat laqtyrýǵa oqtalǵan adamdardy ustady. Olardyń biri sarbazdarmen tóbelesip te qalǵan.</p>

Oqıǵa 8 qazan kúni keshkilik ýaqytta boldy. Qylmystyq-atqarý júıesi №8 mekemesiniń qaýipsizdigin kúzetip júrgen Ulttyq ulan jaýyngeri qatardaǵy Maksım Kım 6 adamnyń aýla jaǵalap júrgenin kóredi. Olar bir sát aıaldap, qorshaý arqyly áldebir zat laqtyrmaq bolady. 

- Maǵan beıtanys eki adam taıap keldi. Óz aty-jónimdi aıtyp, kúzetiletin mekemege jaqyn barýǵa bolmaıtynyn eskerttim. Birden ratsııaǵa eki adamnyń jaqyn kelgenin aıtyp, habar berdim. Artymnan taǵy tórt adam kelip, olar qorshaýǵa qaraı júrdi. Men sońynan júrip, jaqyn jerde júrgen sarbazdarǵa habar berdim. Sol jerde tóbeles bolyp, bireýin ustap aldym. Ózgeleri jabylyp, sytylyp ketýge oqtalǵanymen, meniń janyma kezekshilikte júrgen ózge sarbazdar keldi. Biz birin ustap alyp, polıtsııaǵa tapsyrdyq. Men óz áskerı boryshymdy ótedim dep oılaımyn,- dedi Maksım Kım. 

QR ІІM Ulttyq ulany «Batys» óńirlik qolbasshylyǵynyń baspasóz qyzmetiniń habarlaýynsha, ustalǵan adamdy tintý barysynda qaltasynan eki uıaly telefon jáne eki SIM karta tabyldy. Tárkilengen zattardy anyqtaý jáne odan ári protsessýaldyq sheshim qabyldaý úshin barlyq materıal ákimshilik sotqa jiberildi. Al «Batys» óńirlik qolbasshylyǵynyń qolbasshysy general-maıor Bekaıdar Qazkeev jaýyngerlik qyzmet barysynda qyraǵylyq tanytqan sarbazdardy marapattap, olardy qysqa merzimdi demalysqa jiberdi.

Aıta keteıik, Ulttyq ulanda qyzmettik ıtter 44 qylmysty ashýǵa kómektesti.