Túıneme aýrýynyń shyǵýy Qaraǵandy oblysyndaǵy qaýipsizdikpen qamtýdy eseleı tústi
Jınalysta et satylatyn nysandarǵa júrgizilgen tekserister aıtyldy. Eki aı ishinde oblysta 90 maldárigerlik zańnamany buzý faktisi anyqtalǵany jarııalandy. Tekserýshilerdiń málimetteri boıynsha, maldárigerlik anyqtamany rásimdeýde zań buzýshylyqtar oryn alǵan. Baqylaýshylar sanıtarlyq normalarǵa sáıkestigi týraly tańbanyń joqtyǵyn basa aıtty. Qajetti qujattarsyz et tasymaldaý oqıǵalary da tirkelgen.
Kinálilerge 1,5 mıllıon teńgeden astam aıyppul salyndy.
Semınar-jınalysta «Aýyl sharýashylyǵy janýarlaryn sáıkestendirý» veb-portaly tanystyryldy. Ázirleýshilerdiń aıtýynsha, elimizdiń kez kelgen turǵyny portal kómegimen et óniminiń tasymaldaný jolyn qadaǵalap, onyń veterınarlyq jaı-kúıinen habar ala alady.
«Biz baǵdarlama boıynsha janýardyń qaıdan ekenin, qaıda soıylǵanyn, qaýipsizdik úshin qajetti maldárigerlik qujattardy qashan alǵanyn baqylaı alamyz», - dep málimdedi QR Bas memlekettik sanıtarlyq dáriger Jandarbek Bekshın.
«Oblys boıynsha 8 aı merzimde sanıtarlyq-epıdemıologııalyq qorytyndylary joq 160 nysan anyqtaldy. Zańsyzdyqtar úshin 104,5 mıllıon teńgege 2000-nan astam aıyppuldar salyndy, onyń 14 mıllıonnan astamy sot arqyly óndirildi. 18 nysannyń qyzmeti ýaqytsha toqtatyldy», - dep habarlady sanıtarlyq qyzmet ókilderi.
Aıta keteıik, maýsym-tamyz aılarynda Qaraǵandy oblysynyń Shet jáne Aqtoǵaı aýdandary turǵyndarynyń túıneme aýrýyn juqtyrý faktisi anyqtalǵan bolatyn. Soıylǵan mal asa qaýipti ınfektsııa kózine aınaldy. Túıneme aýrýynan Erkindik aýylynyń eki turǵyny kóz jumdy.