Týyndyda ómirsheńdiktiń ıisi ańqyp tur - Baqytjan Jumaǵulov Elbasynyń kitaby jaıly
«Týyndy maǵan tereń áser qaldyrdy. Bul oqyrmandy beı-jaı qaldyrmas asa yjdahattylyqpen jazylǵan kitap. Kitaptyń taǵy bir erekshe qyryn atap ótkim keledi. Birinshiden, munda Táýelsiz Qazaqstannyń tarıhyn óte shymyr ári naqty paıymmen jazǵan. Ekinshiden, týyndynyń ár jolynda ómirsheńdiktiń ıisi ańqyp tur. Ár jolda, ár reformany baıandaǵan kezde avtordyń emotsıonaldyq kóńil-kúıin sezine alasyz», - deıdi Baqytjan Jumaǵulov.
Akademıktiń aıtýyna qaraǵanda, sońǵy 26 jyldyq tarıhynda Qazaqstannyń damý men órkendeýinde, alǵa ozýynda Ult Kóshbasshysynyń eńbegi zor.
«Dál Elbasynyń aqyl-oıy, ıntellekti men kúsh-jigeri el damýynyń qaıtalanbas modelin jasap berdi. Elbasynyń kitabyn oqyǵannan keıin meniń esime 2005-2008 jyldar aralyǵynda «Nur Otan» partııasynda bolǵan kúrdeli kezeńder esime oraldy. Óıtkeni, 2005 jylǵy Prezıdenttik saılaý búkil partııa úshin ósýdiń, saıası kemeldenýdiń naǵyz synaǵy boldy. Elbasy kitapta atap ótkendeı, ol saılaý HHІ ǵasyrdyń basyndaǵy Qazaqstanyń ishki saıası ómirindegi eń mańyzdy oqıǵaǵa aınaldy. Men sol kezde Elbasynyń saılaýaldy shtabyn basqardym. Tarıhı sátterdiń basy-qasynda boldym. Sol úshin ózimdi baqytty sanaımyn. Osy saılaý elimizdegi jetekshi partııany Parlamenttik úlgidegi partııaǵa aınaldyrýdyń alǵashqy qadamy boldy», - deıdi senator.
Baqytjan Jumaǵulov sol tustaǵy taǵy bir mańyzdy másele - 2007 jylǵy konstıtýtsııalyq reforma ekenin aıtady. Onyń eń basty jańalyqtarynyń biri - elimizdegi Parlament saılaýy proportsıonaldy, ıaǵnı tepe-teńdik saılaý júıesine aýysýy.
«Osylaısha elimizdegi saıası partııalar ashyq básekege, elektoraldy protseske tolyq qosyldy. Bul damyǵan demoktratııalyq elderge tán júıe edi. Biz jańa júıedegi Parlamenttik saılaýdy sátti ótkizdik. Onda bizdiń «Nur Otan» partııasy senimdi túrde jeńiske jetti», - dep eske aldy ótkendi senator.
Baqytjan Jumaǵulov Memleket basshysynyń bastamasymen ǵylymdy basqarýdyń jańa modeli jumys atqaryp jatqanyn tilge tıek etti.
«Bul qadam zertteýshilerdiń jigerin janyp, ıntýzıazmyn birden kóterdi. Keleshekte ǵylymnyń ónimderin kommertsııalandyrý baǵytyna basa mańyz beriledi. Bunyń artynda álbette, zor bolashaq tur. Osynyń barlyǵy jańa kitapta qamtylǵan», - dep túıdi ol.
Eske sala ketsek, Astanada Nursultan Nazarbaevtyń «Táýelsizdik dáýiri» atty jańa kitabynyń saltanatty tusaýkeseri bolyp ótti. Tarıhı pýblıtsıstıka janrynda jazylǵan, qazaq jáne orys tilderinde basylǵan Elbasynyń bul eńbegi elimizdiń jańa tarıhy men onyń erteńine degen avtordyń kózqarasyn tanytady.