Týymyz kóterilgende kóńilim tolqydy - Aıaýlym Ámrenova, frıstaıl mogýlshy

PHENChHAN. QazAqparat - Búgin Ońtústik Koreıanyń Phenchhan qalasynda ótken Qazaqstannyń týyn kóterý rásiminde qazaqstandyq sportshylar tilshilerge erkin suhbat berip, óz oılarymen bólisti, dep habarlaıdy QazAqparat tilshisi.

Solardyń biri -frıstaıl mogýldan el namysyn qorǵaıtyn olımpıadaǵa tuńǵysh ret qatysyp otyrǵan qarakóz qaryndasymyz Aıaýlym Ámrenova kók týymyzdy kóterilgen sáttegi kóńil-kúıin aıtyp berdi.

- Osyndaı baıraǵymyz jelbiregen sátti kórgende kóńilim tolqyp ketetini bar. Búgin erekshe tolqyp turmyn. Sebebi, qazaqtyń týy búkil álem kóz tikken Olımpıada qalashyǵynda jelbiredi. Bul qazaq eli úshin úlken abyroı emes pe?!

- Kók týymyz árkez sizdi jigerlendirip, rýhyńyzdy kóterip jiberetin boldy ǵoı...

- Árıne, óz elimiz, jerimiz, kók týymyz jeke ánuranymyz bar. Osyndaı elde týyp ósken bizde arman joq. Endi, tek jaqsy nátıje kórsetip, búgin kóterilgen týymyzdy ármen qaraı jelbiretip jatsaq, nur ústine nur bolar edi.

- Olımpıadaǵa daıyndyǵyńyz qalaı?

- Barynsha jeńiske jetýge tyrysyp kóremin. Bıyl birinshi ret tórtjyldyq dodada óner kórsetkeli otyrmyn. Sondyqtan shyǵar, azdap qobaljyp júrmin. Boıymda qorqynysh ta joq emes.

- Eń basty qarsylasyńyz kim?

- Bárin jarysta kóre jatarsyzdar. Qansha sportshy bolsa, sonyń barlyǵy basty qarsylasymyz. Onyń ústine tájirıbeli, buryn da Olımpıadada júlde alyp júrgen sportshylar bar. Ońaı qarsylas joq.

- Koreıa sizdi nesimen qyzyqtyryp jatyr?

- Qala taza, jańa. Sondaı-aq, óte tynysh. Qaýipsiz kórindi.

- Sportshylarǵa jasalyp jatqan qyzmetter kóńilińizden shyǵyp jatyr ma?

- Árıne. Qyzmet kórsetý sapasy da unap jatyr.

- Tamaqtaryna qandaı baǵa beresiz?

- Óz elimizdiń tamaǵyndaı qaıdan bolsyn. Biraq, jaman emes.

- Áńgimeńizge rahmet! Sáttilik tileımin...